Ճապոնացիները պատրաստվում են երկնքում պատվերով արհեստական «աստղաթափ» կազմակերպել (տեսանյութ)

«Ընկնող աստղերն» ու ասուպների հոսքը բնության ամենագեղեցիկ երևույթներից են, որոնք  տեղի են ունենում Երկրի մթնոլորտում տիեզերական փոշու, գազի ու աղբի այրման հետևանքով:

Եվ քանի որ հազվադեպ տեղի ունեցող այս երևույթներն անչափ դիտարժան են, ճապոնացի մասնագետները որոշել են շտկել իրավիճակն ու գիշերային երկնակամարում ասուպների արհեստական հոսք և «աստղաթափ» կազմակերպել:

Ինչպես նշում է techinsider.com-ը, մասնավորապես՝ Sky Canvas նախագծի շրջանակում ALE ճապոնական ընկերությունը մտադիր է տիեզերք արձակել մի արբանյակ, որը կգտնվի մոտ 500 կմ բարձրության վրա և պարբերաբար կարձակի 500-1.000 հատ գնդիկ` լցված դյուրավառ գունավոր նյութերով: Երբ այդ գնդիկները մտնեն Երկրի մթնոլորտ, դրանք կվառվեն` նմանվելով «ընկնող աստղերի» կամ ասուպների հոսքի:
 

Լաբորատոր պայմաններում գնդիկների փորձարկման արդյունքները ցույց են տվել, որ դրանց լույսն այնքան պայծառ է, որ տեսանելի կլինի նույնիսկ ամպամածության դեպքում: