Ամերիկյան փողոցներում շուտով ինքնակառավարվող էլեկտրական ավտոբուսներ կերթևեկեն (լուսանկարներ)

Ամերիկյան Local Motors  ընկերությունը կոմպակտ էլեկտրական ավտոբուս է ներկայացրել, որը նախատեսված է 12 ուղևորի համար և կարող է երթևեկել առանց վարորդի:

Ինչպես ներկայացնում է  Motor.ru-ն` Olli անվանումն ստացած նորարար ավտոբուսը  մինչև տարեվերջ կհայտնվի Լաս Վեգասի փողոցներում: Եվս երկուսը կերթևեկեն Ֆլորիդայում, իսկ 4-ը` Դանիայում:

Մինի-ավտոբուսը համալրված է էլեկտրաշարժիչով, որը 40 ձիաուժ հզորություն է զարգացնում: Մեքենայի առավելագույն արագությունը կազմում է 20 կմ/ժամ: Մարտկոցների լիցքավորումը կբավականացնի  շուրջ 50 կմ անցնելու համար:

Ընկերությունից նշել են, որ նմանօրինակ ավտոբուսները հաճախակի վերալիցքավորման կարիք կունենան, սակայն կարծում են, որ  լիցքավորումը կբավականացնի համալսարանների մասնաշենքերի միջև երթևեկությանը: 

Մեքենան կարող է ընթանալ  ավտոպիլոտ ռեժիմով և նախապես ծրագրավորված երկաթուղով` տեղանքում կողմնորոշվելով տարատեսակ սենսորների և ցուցիչների օգնությամբ: