Վրացական արտադրության զրահապատ մեքենան փչացել է Եմենում մարտի ժամանակ (տեսանյութ)

11:02 • 26.08.16

Եմենի ապստամբ հուսիթները հրապարակել են մարտի տեսանյութը, որում երևում է, թե ինչպես է փչանում վրացական արտադրության Didgori Medevac զրահապատ մեքենան, որը պատկանում էր Սաուդյան Արաբիայի բանակին, գրում է lenta.ru-ն:

 

Միջադեպը տեղի է ունեցել օգոստոսի 24-ին Նաջրան քաղաքի մոտակայքում սաուդցի զինվորականների դիրքի վրա ապստամբների հարձակման ժամանակ:

 

Փչանալուց հետո անշարժացած զրահապատ մեքենային մեծ արագությամբ բախվել է դրան հետևող մեկ այլ մեքենա: Հուսիթներն, արդյունքում, կարճատև մարտի ընթացքում կարողացել են ոչնչացնել երկու մեքենաներն էլ:

 

Didgori Medevac-ը զրահապատ բժշկական մեքենա է՝ նախատեսված մարտի դաշտից վիրավորների դուրսբերման համար: Այն ստեղծվել է 2015 թվականին՝ վրացական ռազմական գիտատեխնիկական «Դելտա» կենտրոնի կողմից: