Դատարանում քննվում է ԱՄՆ-ի կողմից հետախուզվող և «Զվարթնոց»-ում բերման ենթարկված ՌԴ քաղաքացուն կալանավորելու միջնորդությունը

15:49 • 29.08.16

Երևանի Կենտրոն և Նորք-Մարաշ վարչական շրջանների ընդհանուր իրավասության դատարանում քննվում է օգոստոսի 26-ին «Զվարթնոց» օդանավակայանից բերման ենթարկված ՌԴ քաղաքացի Սերգեյ Միրոնովին ժամանակավորապես կալանավորելու մասին միջնորդությունը:

Դատական նիստի մեկնարկին լրագրողների հետ զրույցում Սերգեյ Միրոնովն ասել է, որ տեղի ունեցածը սխալմունք է.«Ես հույս ունեմ, որ տեղի ունեցածն ինչ-որ սխալմունք է, որը շուտով լուծում կստանա»:

Դատական նիստի առաջին րոպեները բաց են եղել ԶԼՄ ներկայացուցիչների համար, այժմ դատական նիստը շարունակվում է դռնփակ ձևաչափով:

Հիշեցնենք, որ  օգոստոսի 26-ին «Զվարթնոց» օդանավակայանում հայտնաբերվել և ՔՀԳՎ բերման է ենթարկվել ՌԴ քաղաքացի, 1986 թ. ծնված Սերգեյ Միրոնովը, որը 2016 թ. մայիսի 11-ից միջազգային մակարդակով հետախուզվում է ԱՄՆ իրավապահ մարմինների կողմից ԱՄՆ քր. օր.-ի 18-րդ գլխի 371-րդ և 3155-րդ հոդ. /զենքի արտահանման վերահսկման օրենքը խախտելու նախնական համաձայնություն/, 22-րդ գլխի 2778-րդ «b» կետի 2-րդ մասի և «c» կետի, 18-րդ գլխի 2-րդ և 3551-րդ հոդ. /զենքի արտահանման վերահսկման մասին օրենքի խախտման փորձ/, 18-րդ գլխի 1956-րդ հոդ. «h» և «a» կետերի և 3551-րդ հոդ. /փողերի լվացման նախնական համաձայնություն/, 18-րդ գլխի 1956-րդ հոդ. «a» կետի 2-րդ մասի և 3551-րդ հոդ /փողերի լվացում/ հատկանիշներով նախատեսված հանցագործություն կատարելու համար: