Ջոն Լենոնին սպանողին կրկին մերժել են վաղաժամ ազատ արձակելու հարցում
ԱՄՆ-ում պայմանական վաղաժամ ազատ արձակման հարցով հանձնաժողովը հրաժարվել է ազատ արձակել Ջոն Լենոնին սպանողին, հայտնում է New York Daily News-ը:
Մարկ Դևիդ Չեփմենն արդեն իններորդ անգամ է պայմանական ազատ արձակման մասին դիմում ներկայացնում և ամեն անգամ մերժում ստանում:
Հաջորդ անգամ 61-ամյա Չեփմենը կկարողանա ազատ արձակվելու մասին դիմում ներկայացնել միայն երկու տարի անց:
1980 թվականի դեկտեմբերի 8-ին հանցագործը հինգ անգամ կրակել է հայտնի երաժշտի մեջքին, երբ նա կնոջ՝ Յոկո Օնոյի հետ միասին վերադառնում էր Hit Factory ձայնագրման ստուդիայից: 25 րոպե անց բժիշկները գրանցել են Լենոնի մահը:
Չեփմենը չի փորձել փախչել հանցագործության վայրից, ոստիկանությունը նրան ձերբակալել է հենց այդտեղ:
Դատարանը Չեփմենին դատապարտել է ցմահ ազատազրկման՝ 20 տարի անց պայմանական վաղաժամ ազատ արձակման մասին դիմում ներկայացնելու իրավունքով:










