Հյուսիսային պողոտայի 2 շենքի բնակիչների զրկել են տաք ջրից և օդափոխման ծառայությունից

11:56 • 02.09.16

Երևանի Հյուսիսային պողոտայի 4-րդ և 6-րդ շենքի բնակիչները սեպտեմբերի 1-ի գիշերվանից զրկված են բնակարանների օդափոխման, ջեռուցման, տաք ջրի մատակարարման հնարավորություններից։

Tert.am-ի հետ զրույցում բնակիչներն ասացին, որ այդ ծառայություններն ապահովվող ընկերությունը՝ «ԷՆ ԷՅ 641 ԷՆԵՐՋԻ ԹՐԱՆՍՖԵՐ»-ը, որը վերջերս է ձեռք բերել այլ ընկերությունից նման գործունեություն իրականացնելու իրավունքը, որոշել է ամեն ամիս Հյուսիսային պողոտայի 4-րդ և 6-րդ շենքերի բնակիչներից գանձել 25000-ական դրամ՝ առանց մանրամասնելու, թե ինչի համար։

Բնակիչները նշեցին, որ իրենք համաձայն չեն եղել ամեն ամիս վճարել այդ գումարը, այդ պատճառով ընկերությունը նրանց զրկել են որոշել է բնակարանների օդափոխման, ջեռուցման, տաք ջրի մատակարարումից։


«Առանց այդ էլ ոչ մի տեղ 3300 դրամ սակագին չկա, որ մենք ենք վճարում 1 մ խորանարդ տաք ջրի համար»,- ասաց Հյուսիսային պողոտայի բնակիչներից մեկը։


Նրա փոխանցմամբ՝ իրենք բնակարաններում չունեն գազ, գազ առկա է միայն կաթսայատանը, որը պատկանում է «ԷՆ ԷՅ 641 ԷՆԵՐՋԻ ԹՐԱՆՍՖԵՐ» ընկերությանը։ Նրա խոսքով՝ ՍՊԸ-ն տաքացնում է բնակարան բարձրացող ջուրը և դրա համար ստանում Հայաստանի պայմաններում ոչ քիչ գումար։

Շենքի բնակիչների տեղեկացմամբ՝ բնակարանները վաճառողն իրենց մոլորության մեջ է գցել, քանի որ բնակարանները վաճառելիս իրենց չի տեղեկացրել, որ կաթսայատունը չի պատկանելու իրենց։

Ի դեպ, «ԷՆ ԷՅ 641 ԷՆԵՐՋԻ ԹՐԱՆՍՖԵՐ» ընկերությունը փորձել է դադարեցնել նաև սառը ջրի մատակարարումը, որը կանխվել է։


Մանրամասները՝ տեսանյութում