Պուտինն ասել է, թե ինչպիսին պետք է լինի Ռուսաստանի հաջորդ նախագահը
Ռուսաստանի Դաշնության նախագահ Վլադիմիր Պուտինը պատմել է, թե ինչպիսին պետք է լինի Ռուսաստանի հաջորդ նախագահը: Այդ մասին Ռուսաստանի նախագահը հայտարարել է Bloomberg գործակալությանը տված հարցազրույցում:
«Ապագա առաջնորդը պետք է լինի բավական երիտասարդ, բայց հասուն մարդ»,- ասել է Պուտինը:
Նա նաև հայտարարել է, որ դեռ վաղ է խոսել այն մասին, թե արդյոք նա կմասնակցի 2018 թվականին կայանալիք նախագահական ընտրություններին:
«Ես կարող եմ կա՛մ մասնակցել ընտրություններին, կա՛մ չմասնակցել: Եթե չմասնակցեմ, կընտրվի պետության մեկ այլ ղեկավար, Ռուսաստանի այլ նախագահ, և այդ ժամանակ արդեն իրենք՝ քաղաքացիները կորոշեն, թե ում օգտին է պետք քվեարկել»,- ասել է Պուտինը:
Ընդ որում՝ նա նշել է, որ այժմ արդեն ընթանում են 2018 թվականից հետո տնտեսության զարգացման ռազմավարությանն ուղղված աշխատանքները:
«Այդ պատճառով այդ մասին խոսելը վաղաժամ է: Ժամանակակից աշխարհում, արագ փոփոխվող աշխարհում այդ մասին խոսելը պարզապես վնասակար է: Հարկավոր է աշխատել, հասնել նրան, որ իրականանան պլանները և խնդիրները, որոնք մեր առաջ դրել ենք: Այդ խնդիրների լուծումից կախված՝ կտեսնենք, թե ինչպես է պետք կազմակերպել նախագահական ընտրությունների արշավը 2018 թվականին և ով պետք է մասնակցի դրան: Ես դեռ ինձ համար ոչինչ չեմ որոշել»,- հայտարարել է Պուտինը:










