G20 գագաթաժողովը դարձավ Պուտինի և Էրդողանի հաղթական վերադարձը միջազգային ասպարեզ. Le Monde

10:06 • 07.09.16

Չինաստանում անցկացված G20 գագաթաժողովը դարձավ Ռուսաստանի և Թուրքիայի նախագահներ Վլադիմիր Պուտինի և Ռեջեփ Թայիփ Էրդողանի հաղթական վերադարձը միջազգային դաշտ, գրում է ֆրանսիական Le Monde թերթը:

 

Ինչպես նշվում է, եթե G20-ի անցած 2 գագաթաժողովներին Վլադիմիր Պուտինը հայտնվել էր մեկուսացման մեջ Ուկրաինայում տեղի ունեցած իրադարձությունների պատճառով, ապա չինական Հանչժոուում նա անփոխարինելի զրուցակից էր:

 

Այդպես, Պուտինը նոր թափ է հաղորդել Սաուդյան Արաբիայի հետ բանակցություններին, որի հետ հակադիր դիրքորոշումներ ունի մասնավորպես Սիրիայի նախագահ Բաշար ալ Ասադի ճակատագրի հարցում: Նրանք անգամ նավթի արդյունահանման մասին համաձայնագիր են ստորագրել:

 

Եվս մի «անակնկալ» էր ԱՄՆ նախագահ Բարաք Օբամայի հետ հանդիպումը, որի արդյունքներով Պուտինն ընդունել է ԱՄՆ նախագահի «անկեղծությունը» սիրիական ճգնաժամի լուծման որոնման հարցում:

 

Ինչ վերաբերում է Էրդողանին, դա այդ մակարդակի նրա առաջին միջազգային բանակցություններն էին Թուրքիայում հեղաշրջման փորձից հետո, որին հետևել էր Արևմուտքի հետ հարաբերությունների վատթարացումը, նշված է հոդվածում:

 

Գագաթաժողովին Թուրքիայի նախագահն առաջ էր տանում Թուրքիայի և Սիրիայի սահմանին բուֆերային գոտու ստեղծման իր ծրագիրը: Ի տարբերություն անցած տարվա՝ այս անգամ նա դա վստահությամբ էր անում, որին նպաստում էր Ռուսաստանի հետ հարաբերությունների վերագործարկումը: