Նոր կառավարությունում կլինեն կադրային լուրջ փոփոխություններ. կաբինետի անվանական հարցը, սակայն, այսօր չի քննարկվել. Արմեն Աշոտյան (տեսանյութ)

22:30 • 08.09.16

Նոր կառավարությունից իշխող ՀՀԿ-ն ակնկալում է տնտեսական երկարաժամկետ աճի համար համապատասխան հնարավորությունների ստեղծում: Այս մասին այսօր ՀՀԿ ԳՄ և խորհրդի նիստից հետո լրագրողների հետ զրույցում հայտարարեց կուսակցության փոխնախագահ Արմեն Աշոտյանը՝ ավելացնելով, որ ակնկալում են նաև տնտեսության մեջ ներդրումային միջավայրի փոփոխություններ:

Աշոտյանի խոսքով՝ առաջարկվող ծրագիրը պետք է լինի ոչ թե կարճաժամկետ, այլ՝ երկարաժամկետ:

«Ամեն կառավարություն ինքնին պատմական է, ելնելով հանրությունից բխող ազդակներից, որոշում է կայացվել նոր կառավարությամբ գնալ դեպի խորհրդարանական ընտրություններ: ՀՀԿ անունից շնորհակալություն ենք հայտնել Հովիկ Աբրահամյանին՝ իր կատարած աշխատանքի համար»,- նշեց Արմեն Աշոտյանը:

ՀՀԿ փոխնախագահի խոսքով՝ իրենք ակնկալում նոր զարգացումներ,  այնպիսի միջավայրի ձևավորում, որը Հայաստանին թույլ կտա էլ ավելի լավ օգտագործել իր հանրային ռեսուրսը, մարդկային կապիտալը: Խոսքն այստեղ չի գնում միայն հայաստանցիների, այլ համայն հայության մարդկային կապիտալի մասին:

Իսկ հարցին, թե քննարկվե՞լ է արդյոք նոր կառավարության կազմը, Արմեն Աշոտյանը պատասխանեց, որ խորհրդի այսօրվա նիստում այդ հարցը չի քննարկվել: «Չի քննարկվել կաբինետի անվանական կազմը, պորտֆելների բաշխման հարցը: Ակնհայտ է, որ կաբինետը ձևավորվելու է կոալիցիոն հուշագրի համատեքստում, կան համապատասխան ժամկետներ, դրանք են՝ վարչապետի նշանակման համար մինչև 10 օր, 20 կաբինետի ձևավորման համար ու ևս 20 օր ծրագրի ձևավորման համար»- նշեց Աշոտյանը:

Դիտարկմանը, թե ՀՀԿ-ականներից արդեն շտապել են հայտարարել, որ լուրջ փոփոխություններ են սպասվում, կուսակցության փոխնախագահը պատասխանեց. «Կլինեն լուրջ փոփոխություններ, բայց անվանական հարց չի քննարկվել: Վստահ եմ, որ ապագա կազմը լինելու է համախոհների թիմ, որոնք կկարողանան կարճաժամկետ ու երկարաժամկետ մարտահրավերներին տալ համապատասխան լուծումներ»: