Լրատվամիջոցները ֆիքսել են Օբամայի «խեթող» հայացքն իրեն «անառակի որդի» անվանած Ֆիլիպինների նախագահին (լուսանկարներ)
ԱՄՆ-ի նախագահ Բարաք Օբաման Լաոսում Արևելաասիական գագաթնաժողովին մասնակցել է ասիական ավանդական հանդերձով։

BBC-ն գրում է, որ գագաթնաժողովի ժամանակ նախագահը ոչ պաշտոնական հանդիպում է ունեցել օրեր առաջ իրեն հրապարակայնորեն վիրավորած և «անառակի որդի» անվանած Ֆիլիպինների նախագահ Ռոդրիգո Դուտերտեի հետ:
Ի դեպ, ֆոտոշարքի լուսանկարներից մեկում երևում է՝ ինչպես է Օբաման ծածուկ հայացք գցում Դուտերտեի կողմը, իսկ վերջինս էլ նայում է ԱՄՆ-ի նախագահի ուղղությամբ:

Ինչպես ավելի վաղ հայտնել է Tert.am-ը, Դուտերտեն ափսոսանք է հայտնել ԱՄՆ-ի նախագահ Բարաք Օբամային «անբարոյականի զավակ» կոչելու համար: Դուտերտեի մամուլի խոսնակ Էռնեստո Աբելան նշել է, որ նախագահն ամենևին էլ նպատակ չի ունեցել անձնական վիրավորանք հասցնել Օբամային:
Դուտերտեն Օբամային «անբարոյականի զավակ» է անվանել, երբ Միացյալ Նահանգները քննադատել է Ֆիլիպինների նախագահի՝ թմրամոլների և թմրավաճառների դեմ հայտարարված արյունալի պատերազմը:
«Անբարոյականի զավակ, ես քեզ կանպատվեմ հանդիպման ժամանակ»,-ասել էր Դուտերտեն, ով Լաոսի մայրաքաղաքում պետք է հանդիպեր Օբամային:
«Իրականում ես չեմ ցանկանում վիճել նրա հետ: Նա աշխարհի ամենահզոր նախագահն է»,-ավելի ուշ պարզաբանել է ֆիլիպինցի ղեկավարը: Միևնույն ժամանակ, Դուտերտեն ասել է, որ իրեն բարկացնում են ԱՄՆ-ի պետդեպի մի շարք անդամներ, ովքեր անդադար խոսում են մարդու իրավունքներից:
Օբաման՝ Բրունեյի սուլթանի հետ











