Բրիտանացի բժիշկները ռոբոտի օգնությամբ աչքի աննախադեպ վիրահատություն են անցկացրել

Մեծ Բրիտանիայի Օքսֆորդ քաղաքի հիվանդանոցներից մեկում  իրականցվել է իր տեսակի մեջ աշխարհում առաջին վիրահատությունը, որի ժամանակ ռոբոտի միջամտության արդյունքում վերականգնվել է հիվանդի տեսողությունը:

Ինչպես նշում է The Guardian-ը, հիվանդը՝ 70-ամյա քահանա Ուիլյամ Բիվերը պատմել է, որ իր աչքի ցանցաթաղանթի վրա փառ էր առաջացել՝ փչացնելով տեսողությունը: Հայտնի է, որ փառը եղել է չափազանց բարակ՝ 1 միլիմետրի 1/100-րդ մասի  հաստությամբ: Ուստի՝ բժիշկները չէին կարող այն հեռացնել առանց ցանցաթաղանթը վնասելու:

Ստեղծված իրավիճակում օգնության է հասել ռոբոտային համակարգը, որն իր  հնարավորություններով գերազանցում է բժիշկների մասնագիտական կարողությունները: Հայտնի  է, որ վիրաբույժները ռոբոտի շարժումներն ու գործողությունները կառավարել են  հատուկ ջոյսթիքի միջոցով:

«Այսօր մենք տեսանք, թե ինչպիսին է լինելու ակնաբուժական վիրահատությունների ապագան: Ռոբոտային համակարգը  միանգամայն նոր էջ բացեց մեր մասնագիտական ոլորտում, ինչը  նախկինում անհասանելի էր»,-նշել է վիրաբույժ Ռոբերտ ՄըքԼարենը: