Ազգային համաձայնության կառավարությունն ընդամենը բառախաղ է. մտավորական (տեսանյութ)
Մտավորական Ռուզան Մարգունին Tert.am –ի հետ զրույցում, անդրադառնալով Հայաստանում վարչապետի փոփոխությանն ու ձևավորվելիք ազգային համաձայնության կառավարությանը, կարծիք հայտնեց, որ խոսքն ընդամենը բառախաղի մասին է:
«Պահանջները, մասնավորապես, ամենառադիկալ խմբի` «Սասնա ծռերի»՝ ազգային համաձայնության կառավարությունը չէր, այլ ազգային վստահության, իսկ վստահության չափանիշը, ինչպես հայտնի է, Հայաստանում շատ ցածր է: Եվ թե այդ համաձայնությունը ում հետ է՝ հենց ներսի, վարչախմբի ներկայացուցիչներն են իրար հետ «համաձայնեցնում»: Ես գոնե տեղյակ չեմ, թե այդ ինչ համաձայնություն է, ժողովուրդն էլ, կարծում եմ: Մի բան է միայն ակնհայտ, որ նշանակվում է «Գազպրոմի» ներկայացուցիչ, ինչն, ըստ էության, նշանակում է, որ ավելի են խորացվելու մեր հարաբերությունները, որոնք հարաբերությունների նման էլ չեն»,-ասում է մտավորականը:
Ըստ նրա` Կարեն Կարապետյանի նշանակումը ռուսական դիտողությունների արտահայտումն է Հայաստանի քաղաքական ղեկավարությանը, թե ինչու ԵՏՄ կազմում Հայաստանը լավ տնտեսական ցուցանիշներ չի դրսևորել:
«Պուտինը նման հայտարարություն արեց, տասը տոկոս էր ասում, և , ըստ երևույթին, ներքին զրույցների ժամանակ ասել են` ինչո՞ւ չկա, ինչ-որ բան ցույց տվեք, «Էս էն գէ»-ում լավ է ամեն ինչ, ու էս խաղերի մեջ Կարեն Կարապետյան են բերել, որ ապացուցեն, որ տնտեսություն են փոխում: Մանավանդ՝ էս մարդն արտաքին ավելի լավ տեսք ունի, ավելի ներկայանալի է և այլն, շատ շատերը նույնիսկ ոգևորված են, բայց այդ ոգևորությունն ինքս չունեմ»,-ավելացրեց նա:
Այսինքն, ըստ նրա, սա արտաքին քաղաքական նշանակում էր, որը ենթադրում է նաև նման կաբինետի նշանակում:
Անդրադառնալով ՀՀ պաշտպանության նախարար Սեյրան Օհանյանի` Հավաքական անվտանգության մասին պայմանագրի կազմակերպության (ՀԱՊԿ) գլխավոր քարտուղարի պաշտոնում նշանակվելուն, ինչի մասին Интерфакс գործակալությանը սեպտեմբերի 11-ին հայտնել էր ՌԴ կառավարության աղբյուրը, Ռուզան Մարգունին ասաց. «Ես տեղյակ չեմ` վերջին պատերազմի ժամանակ ով էր մեղավոր, ով չէ, ճիշտ է՝ զոհեր ենք տվել, բայց բանակից ես խուսափում եմ խոսել։ Շատ հավանական է, որ լավ է աշխատել, դրա համար են հանում»:
Անդրադառնալով Անկախության 25-ամյակի տոնակատարություններին` ընդդիմադիր հայացքների տեր մտավորականն ասաց. «Մենք պետություն չունենք, եթե մի պետություն միայն մեկից է կախված՝ Հայաստանը` Ռուսաստանից, տնտեսությունը ևս, եթե Հայաստանում չեն կայացվում ինքնուրույն որոշումներ, Իրանի հետ իրավունք չունենք կապ ունենալու, մինչև չհարցենք»:
Մանրամասները` տեսանյութում










