Curiosity մարսագնացն արտասովոր փլվածքների լուսանկարներ է ուղարկել (լուսանկարներ)

Curiosity մարսագնացը Երկիր է ուղարկել Մարս մոլորակի վրա գտնվող Շարպ լեռան ստորոտի արտասովոր բնապատկերների լուսանկարները, հաղորդում է NASA-ի (Օդագնացության և տիեզերական տարածության հետազոտությունների ազգային գործակալություն) մամուլի ծառայությունը:

Աղբյուրը մանրամասնում է, որ լուսանկարներն արվել են սեպտեմբերի 8-ին` Mast Camera խցիկի օգնությամբ: Մյուրեյ Բաթս բլուրներն ու դրանք շրջապատող սեղանաձև լեռները հինավուրց ավազաքարերի մնացորդներ են, որոնք առաջացել են Շարպ լեռան ստորոտի կազմավորումից հետո:

«Այդ բլուրների ուսումնասիրությունը թույլ է տալիս ավելի լավ հասկանալ հինավուրց ավազաբլուրների կազմավորումը, որոնք ջրի ազդեցության տակ քիմիական փոփոխությունների են ենթարկվել, մերկացել ու լանդշաֆտ դարձել, որը և դիտում ենք այսօր»,- մանրամասնել է առաքելության մասնակից Աշվին Վասավանդան: