ԸՕ այս փոփոխություններով հնարավոր է ՀՀ-ում իշխանափոխություն իրականացնել. Լևոն Զուրաբյան
Ընտրական օրենսգրքի փոփոխությունների շուրջ կնքված փաստաթուղթը ազատ ու արդար ընտրությունների երաշխիք չէ, սակայն այդ փոփոխություններով հնարավոր է իշխանափոխություն իրականացնել Հայաստանում ընտրությունների միջոցով: Այս մասին այսօր լրագրողների հետ զրույցում ասաց ԱԺ «Հայ ազգային կոնգրես» խմբակցության ղեկավար Լևոն Զուրաբյանը:
«Սա դեռ մաքուր, ազատ, արդար ընտրությունների երաշխիք չէ։ Ես ասացի, որ սա մի լուրջ հիմնաքար է, մի հիմք է ստեղծված, որի վրա պայքարելով՝ կարելի է հասնել արդյունքի: Այս էտապի պայքարը բերել է հաջողության, բայց սրանով ազատ ու արդար ընտրություններ դեռ չեն հաստատվի Հայաստանում: Մենք պիտի շարունակենք պայքարը, պայքարը պիտի լուրջ լինի, թեժ՝ ժողովրդի աջակցությամբ ու մասնակցությամբ»,-ասաց Լևոն Զուրաբյանը:
Լևոն Զուրաբյանն ասաց, որ փաստաթղթի ստորագրումը կարևորագույն, վերջնական հաղթանակ չի համարում, սակայն այն պատմական է այն առումով, որ 2005 թվականից ի վեր ժողովուրդն ու ընդդիմությունը նպատակ են ունեցել բացահայտել գրանցամատյաններում թաքնված իշխանության վերարտադրման գաղտնիքը։
«Իշխանությունները հենց դրա համար են դիմադրել ցուցակների հրապարակմանը՝ հասկանալով, որ դա էապես կրճատում է ընտրակեղծիքի պաշարը: Այսօր կարելի է ասել, որ այս փաստաթղթի ձեռքբերմամբ կրճատվում է Հայաստանում խաղի կանոնները, ընտրություններում արդեն կարելի է իմաստալից պայքար տանել։ Դա հավասար պայքար չէ, որովհետև իշխանության կողմն է մնում ընտրակաշառքի բաժանումը և այլն, այդ հարցերը դեռ չենք լուծել, բայց այս հարցի լուծումով հնարավոր է իշխանափոխություն ընտրությունների միջոցով անգամ անհավասար պայքարում»,-ասաց նա։
Լևոն Զուրաբյանի խոսքով՝ մինչ ԸՕ-ի փոփոխությունների շուրջ համաձայնության ձեռքբերումը հնարավոր չէր ընտրությունների միջոցով փոփոխության հասնել, որովհետև իշխանությունը գրանցամատյաններում հավելագրումների հնարավորություն ուներ, իսկ հիմա դա բացառված է:










