ԱՄՆ-ում 5-ամյա երեխան հերոին է տարել մանկապարտեզ

23:32 • 15.09.16

ԱՄՆ Նյու Ջերսի նահանգի Թրենթոն քաղաքի ոստիկանությունը հետաքննություն է սկսել մանկապարտեզներից մեկում տեղի ունեցած միջադեպի գործով:

Ինչպես տեղեկացնում է Fox News-ը` հինգամյա երեխան իր հետ տնից մանկապարտեզ է բերել հերոինի 30 փաթեթ: Դաստիարակը սկզբում մտածել է, որ երեխան կոնֆետների փաթեթավորումների հետ է խաղում: Մոտենալով դրանք վերցնելու համար` դաստիարակչուհին հայտնաբերել է, որ դրանք իրականում հերոինի փաթեթներ են:

Ոստիկանության տվյալներով` երեխայի մոտ մոտ 30 փաթեթ է եղել, որոնց մի մասը նա բերել նախաճաշի տուփով:

Երեխային տեղափոխել են հիվանդանոց, որտեղ նրա օրգանիզմում թմրամիջոցի հետքեր չեն հայտնաբերվել:

Ոստիկանությունը դեռևս չի պարզել, թե որտեղից է երեխան վերցրել փաթեթները: