Մանհեթենի առավոտյան պայթյունի՝ միջազգային ահաբեկչություն լինելու վերաբերյալ հետքեր դեռ չկան. Նյու Յորքի նահանգապետ

20:38 • 18.09.16

ԱՄՆ Նյու Յորք նահանգի նահանգապետ Էնդրյու Կուոմոն կիրակի հայտարարել է, որ չկա այնպիսի մի հետք, որը ցույց կտար, որ Մանհեթենում այսօր առավոտյան տեղի ունեցած պայթյունը միջազգային ահաբեկչություն է եղել:

Լրագրողների հետ զրույցում նա նշել է, որ հետաքննությունը դեռևս վաղ փուլում է գտնվում, սակայն ահաբեկչության մասին հուշող ոչ մի ապացույց չկա:

Ինչպես հաղորդում է CNN-ը, Նյու Յորքի քաղաքապետ Բիլ դե Բլազիոն ավելի վաղ հայտարարել է, որ կատարվածը «կանխամտածված գործողություն» է: Նախնական տվյալների համաձայն` պայթուցիկ նյութը տեղադրված է եղել աղբարկղում:

Դեռևս պաշտոնական վարկած չի հնչեցվել պայթյունի իրականացման պատասխանատուների մասին, որի ժամանակ 29 մարդ է վիրավորվել: