Ճապոնիայում թայֆունի պատճառով չեղյալ է հայտարարվել ավելի քան 100 չվերթ
Ավելի քան 100 ներքին չվերթ է ժամանավորապես չեղյալ հայտարարվել ճապոնական Կյուսյու և Սիկոկու կղզիներում՝ «Մալակաս» թայֆունի պատճառով: Ավելի քան 32 հազար բնակիչ ստացել է տարհանման մասին հրահանգ, գրում է «ՌԻԱ Նովոստի»-ն։
Սիկոկու կղզում Տոկուսիմա պրեֆեկտուրայի լեռնային շրջաններում տարհանման մասին հրահանգ է ստացել մոտ 30 հազար բնակիչ՝ թայֆունի մոտենալուն պես սողանքների և փլուզումների վտանգի պատճառով:
Կոտի պրեֆեկտուրայում տարհանման է սպասում 2 հազար 671 մարդ:
Քամին և անձրևները մի քանի շրջաններում էլեկտրամատակարարման խափանումների պատճառ են դարձել: Ինչպես հայտնել է «Կիոդո» գործակալությունը, Կագոսիմա պրեֆեկտուրայում առանց էլեկտրականության է մնացել 246 հազար բնակիչ:










