Լեռնային Ղարաբաղում շարունակվում է «սառած» հակամարտությունը. Էստոնիայի նախագահ
Էստոնիայի նախագահ Թոոմաս Հենդրիկ Իլվեսը դատապարտել է Ռուսաստանի ագրեսիան՝ հիշեցնելով, որ ինքը 2008 թվականին զգուշացրել է ՄԱԿ-ի Գլխավոր ասամբլեային աչք չփակել այդ ժամանակ Ռուսաստանի կողմից Վրաստան ներխուժմանը:
«Միջազգային իրավունքը հստակորեն խախտվել էր, չնայած դրան՝ քիչ բան արվեց»,- ասել է նա ՄԱԿ-ի Գլխավոր ասամբլեայում ունեցած ելույթի ժամանակ: Այդ մասին հաղորդում է ՄԱԿ-ի կայքը:
«Վեց տարի անց՝ 2014 թվականին, մենք տեսանք դրա կրկնությունն Ուկրաինայում: Ինքնիշխան պետության մի մասն անեքսիայի ենթարկվեց, մի մասը վերածվեց պատերազմի դաշտի: Երկրորդ համաշխարհային պատերազմից ի վեր առաջին անգամ Եվրոպայում սահմանները փոփոխվեցին ուժի միջոցով: Սահմանները փոխելու համար ուժի կիրառման արգելքը դրված է ՄԱԿ-ի կանոնադրության սրտում»,-ասել է նա։
Ըստ նրա՝ Ռուսաստանի ագրեսիան Ուկրաինայում շարունակվում է:
«Վրաստանի և Ուկրաինայի տարածքներն օկուպացված են մնում օտարերկրյա ռազմական ուժի կողմից, «սառած» հակամարտությունները պահպանվում են Լեռնային Ղարաբաղում և Մերձդնեստրում»,- հավելել է նա՝ կոչ անելով միջազգային նորմեր և մեխանիզմներ սահմանել միջազգային իրավունքի պահպանումն ապահովելու համար:
«Եթե ՄԱԿ-ը չսկսի ավելին անել, այն ժամանակի ընթացքում կկորցնի ակտուալությունը: Երբ մենք համաշխարհային մարտահրավերի ենք բախվում, ՄԱԿ-ը պետք է առաջին վայրը լինի լուծում գտնելու համար, ոչ թե վերջինը, երբ բոլոր տարբերակները սպառվել են՝ իմանալով, որ միևնույն է՝ ոչինչ տեղի չի ունենա»,- ասել է նա:










