ԻՊ-ը Սիրիայի տարածքից հրթիռակոծել է թուրքական Քիլիս նահանգը, բնակիչները շտապ տարհանվում են (լուսանկարներ)
«Իսլամական պետություն» խմբավորումը «Կատյուշա» համազարկային կրակի ռեակտիվ համակարգի միջոցով Սիրիայի տարածքից հրթիռակոծել է Թուրքիայի Քիլիս շրջանը, գրում է թուրքական «Միլլիյեթ» թերթը:
Հրթիռն ընկել է համանուն նահանգի կենտրոն համարվող Քիլիս քաղաքի Ջանփոլաթ փաշա թաղամասի վրա, որտեղ վիրավորվել է 6 մարդ, նրանցից 5-ը երեխաներ են:
Դեպքի վայր են ժամանել մեծ թվով ոստիկանական ուժեր և շտապօգնության մեքենաներ:
Ոստիկանները շրջապատել են թաղամասն ու շտապ տարհանում են բնակիչներին: 



Նշենք, որ թուրքական հատուկ նշանակության ուժերն օգոստոսի 24-ի առավոտյան մտել են Սիրիայի տարածք՝ «Իսլամական պետություն» խմբավորման գրոհայիններից հյուսիսային Ջերաբլուս քաղաքի ազատագրման գործողության շրջանակներում: Թուրքական ԶՈւ-ին աջակցում են նաև «Սիրիական ազատ բանակ» ընդդիմադիր խմբավորումն ու կոալիցիոն ուժերը՝ օդային հարվածների միջոցով:










