Րաֆֆի Հովհաննիսյանն ու «Ժառանգությունը» միացել են «Արդարություն Հայաստանում» արշավին
«Ժառանգություն» կուսակցության նախագահ Րաֆֆի Հովհաննիսյանը ու իր առաջնորդած քաղաքական ուժը միացել են «Արդարություն Հայաստանում» արշավին, որի մեկնարկը տվել էին աշխարհահռչակ երաժիշտ Սերժ Թանկյանը, ամերիկահայ դերասան Վահե Բերբերյանը և անվանի ռեժիսոր Ատոմ Էգոյանը
«Ի նշան համերաշխության այդ նախաձեռնությանը և հաշվի առնելով հանրապետության վերջին 25 տարվա իրողությունները, մենք իրավամբ հպարտանում ենք մեր հավաքական ձեռքբերումներով և շատ ավելին ենք ակնկալում գալիք սերունդների համար, որպեսզի նրանք կարողանան ներդնել իրենց ստեղծագործական ողջ ներուժը և մեր պետությունը դարձնել ժամանակակից, մրցունակ ու շատ ասպարեզներում առաջատար: Դա թույլ կտա կերտելու բացառապես Նոր Հայաստան՝ ազատ ու արդար, ժողովրդավար ու ինքնիշխան, աշխարհի բոլոր հայերի միասնական ներգրավմամբ՝ իրավունքով ղեկավարվող ծաղկուն Հայրենիք:
Սա մեր սեփական ազգային ստուգատեսն է, որը պետք է անցնենք արժանապատվությամբ ու առաքինությամբ՝ և՛ նրանց անունից, ովքեր կռվեցին ու ընկան, և՛ հանուն նրանց, ովքեր ապրելու ու առաջնորդելու են վաղը»,-ասված է հայտարարության մեջ:










