ՀՅԴ-ի համար գերխնդիրը պորտֆելների քանակը չէ. Աղվան Վարդանյանը Արծվիկ Մինասյանի՝ ԲՆ տեղափոխման մասին (տեսանյութ)
ՀՀ էկոնոմիկայի նախարարի պաշտոնակատար Արծվիկ Մինասյանին նորանշանակ վարչապետ Կարեն Կարապետյանն առաջարկել է մնալ կառավարությունում և աշխատանքը շարունակել որպես ՀՀ բնապահպանության նախարար: Այս մասին այսօր լրագրողների հետ զրույցում հայտարարեց ԱԺ «Հայ Յեղափոխական Դաշնակցություն» խմբակցության քարտուղար Աղվան Վարդանյանը:
Աղվան Վարդանյանի տեղեկացմամբ` Կարեն Կարապետյանն ինքն է Արծվիկ Մինասյանին առաջարկել մնալ և գլխավորել Բնապահպանության նախարարությունը:
Լրագրողների հարցին, թե արդյոք Արծվիկ Մինասյանը կարող է աշխատել որպես բնապահպանության նախաարար` ոլորտի մեջ չլինելով, ՀՅԴ խմբակցության քարտուղարը պատասխանեց, որ Արծվիկ Մինասյանի հմտությունները բոլորին են հայտնի և վստահություն հայտնեց, որ խնդիր չի լինի:
Tert.am-ի այն հարցին, թե արդյոք լուսանցքային չի դառնում ՀՅԴ դերը կոալիցիայում էկոնոմիկայի նախարարի պորտֆելի կորստից հետո, Աղվան Վարդանյանը վստահեցրեց, որ ՀՅԴ-ն չի պատրաստվում դուրս գալ կոալիցիայից ու հայտարարեց, թե ՀՅԴ-ի համար գերխնդիրը ոչ թե պորտֆելների քանակն է, այլ ծրագրերի իրականացումը:
Նա նաև ասաց, որ Կարեն Կարապետյանը վճռական է պայքարելու կոռուպցիայի և երկրում այլ խնդիրների լուծման համար:










