Ադրբեջանի հանրաքվեն բարդ իրավիճակի մեջ է դրել Պետդեպի մամուլի խոսնակին. ադրբեջանական լրատվամիջոց
ԱՄՆ-ն կողմ է Ադրբեջանում «առավել ուժեղ ժողովրդավարության» կառուցմանը։ Այդպես է մեկնաբանել Ադրբեջանի սահմանադրական փոփոխությունների մասին հանրաքվեի արդյունքներն ԱՄՆ պետդեպարտամենտի պաշտոնական ներկայացուցիչ Մարկ Թոները՝ պատասխանելով լրագրողների հարցին, հայտնում է contact.az-ը:
«Մենք կոչ ենք անում Ադրբեջանի կառավարությանը հետաքննել խախտումների մասին հաղորդագրությունները»,- ասել է Թոները:
Հարցին, թե արդյոք լավ է, երբ մի ընտանիք այդքան ժամանակ կառավարում է երկիրը, և ղեկավարի որդին կարող է շարունակել է՛լ ավելի երկար կառավարել՝ Թոները պատասխանել է. «Մեր ուշադրությունն ուղղված է ինստիտուտների բարելավմանը, ժողովրդավարական գործընթացի բարելավմանն Ադրբեջանի ժողովրդի և կառավարության հետ համագործակցության ճանապարհով: Բայց մենք չենք կարող թելադրել ժողովրդավարական գործընթացի արդյունքները: Մենք միայն կարող ենք նշել, որ կան խախտումներ, և դրանք պետք է հետաքննվեն, թերությունները պետք է պարզվեն և վերացվեն»:
Հարցին, թե դա արդյոք ժողովրդավարական գործընթա՞ց է, երբ երկրում կարող է լինել ցմահ նախագահություն՝ Թոներն ասել է. «Ադրբեջանը յուրահատուկ չէ երկար ժամանակ կառավարող ղեկավարի առկայության տեսանկյունից: Մեր հիմնական նպատակը գործընթացը, գոյություն ունեցող կառույցների շրջանակներում ժողովրդավարական հաստատությունները բարելավելն է, մենք չենք կարող թելադրել նախագահական ժամկետները»:
Հիշեցնենք, որ Ադրբեջանի քաղաքացիները երկուշաբթի քվեարկել են երկրի սահմանադրությունում փոփոխություններ մտցնելու վերաբերյալ հանրաքվեում:
Սահմանադրության փոփոխություններով նախատեսվում է նախագահի պաշտոնավարման ժամկետը հինգ տարուց երկարաձգել յոթի, ներդնել փոխնախագահների պաշտոններ, ինչպես նաև նվազեցնել երկրի նախագահի և պատգամավորի թեկնածուների համար գործող տարիքային շեմը:










