Իմ ձեռքերն այնպիսիք չեն, որոնցից կարելի է որևէ բան վերցնել. Տիգրան Ուրիխանյանը՝ մանդատը վայր դնելու ու կուսակցության ղեկավարությունը թողնելու մասին

16:21 • 03.10.16

Այսօր «Ալյանս» կուսակցության ղեկավար Տիգրան Ուրիխանյանը նախագահի պաշտոնից հրաժարականի դիմում է ներկայացրել կուսակցության վարչությանը՝ միաժամանակ շարունակելով մնալ կուսակցության վարչության կազմում: ՀՀ ԱԺ պատգամավոր Տ. Ուրիխանյանը միաժամանակ պատգամավորական մանդատը վայր դնելու մասին դիմում է ներկայացրել ՀՀ ԱԺ նախագահին:

Մինչ Տիգրան Ուրիխանյանն այսօր կլքեր ԱԺ շենքը, Tert.am-ը մի քանի հարց ուղղեց նրան: Վերջինս խոստացավ բացահայտումներ ներկայացնել 2 օր հետո:

- Պարոն Ուրիխանյան, հնարավո՞ր է Ձեր վրա քաղաքական ճնշում է  եղել, որ հեռանում եք։ Կամ՝ Ձեր ԱԱԾ ղեկավար մորաքրոջ որդի՞ն է որևէ կերպ ազդել:

-Իմ վրա չի կարող լինել ոչ մի ճնշում: Ես ոչ մի բարեկամ չունեմ, որ կարող էր կամ կարող է որևէ դերակատարում ունենալ իմ գործունեության վրա: Հիշեք, որ ես 5-րդ տարին է՝ ԱԺ պատգամավոր եմ և մնացած բոլորը դրանից շատ ավելի ուշ են նշանակվել իրենց պաշտոններում:

- Ի՞նչն է պատճառը, որ Դուք թողնում եք պատգամավորական մանդատը, չէ՞ որ Ձեզ ընտրել են:

- Մեղմ ասած, չափազանց պարկեշտ ու պատշաճ իրականացրել եմ իմ պատգամավորական գործունեությունը 4.5 տարիների ընթացքում և, առանց ավելորդ համեստության, արել եմ բացառապես այն, ինչ ինձնից ակնակալել է ժողովուրդը:

- Հնարավո՞ր է՝ այլևս չեք ուզում ընդդիմադիր լինել, դրա համար եք հեռանում:

- Ես շարունակում եմ մնալ ընդդիմադիր «Այլանս» կուսակցության վարչության անդամի կարգավիճակում:

- Եվ ո՞վ է ղեկավարելու «Ալյանս» կուսակցությունը:

- Համագումարն ինքը կորոշի՝ ով է ղեկավարելու։

- Այսինքն՝ կուսակցությունը Ձեր ձեռքից վերցնո՞ւմ են. դուք եք այն հիմնադրել:

- Կուսակցությունը առարկա չէ, իսկ իմ ձեռքերն այնպիսի ձեռքեր չեն, որոնցից կարելի է որևէ բան վերցնել:

-Սակայն Դուք շատ արմատական ծրագրեր ունեիք, որ պետք է փոփոխություններ անեիք, ինչ-որ բաներ էիք խոստացել հանրությանը, այդ խոստումները, ծրագրերն ո՞ւր մնացին: Ինչպե՞ս եք հանրությանը հրաժեշտ տալիս:

- Ես հրաժեշտ չեմ տալիս: Ամեն ինչ առջևում է:

- Քաղաքական նոր պրոե՞կտ եք սկսում:

- Ես պրոեկտներ չեմ իրականացնում:

- Հնարավո՞ր է, որ ռուսական ուժերի,  ռուսական դեսպանատան հետ է եղել խնդիրը:   

- Ինձ ռուսական ուժերը չեն հետաքրքրել և չեն էլ հետաքրքրում:

- Իսկ «Անալիտիկ» լրատվական կենտրոնի հետ դատական վե՞ճը:

- Առավել ևս:

- ԲՀԿ ներկայացուցիչ Լյովա Խաչատրյանը հայտարարել է, որ բանակցություններ են գնում Գյումրու ավագանիում իրենց միանալու հետ կապված: Նման բանակցություններ կա՞ն Ձեզ հետ:

- Ինձ միայն հետարքրքում է մեկ բան՝ ՀՀ քաղաքացու ու Հայաստանի շահը: Արել եմ ամեն ինչ դա պաշտպանելու համար: Ցանկացած ձևաչափի մեջ ևս շարունակելու եմ:

- Ո՞ր ձևաչափի մեջ, կմանրամասնեք, որ հասարակությանը հասկանալի լինի:

-4.5 տարվա իմ պատգամավորական գործունեությունը տալիս է դրա պատասխանը:

- Կարելի՞ է ասել, որ Դուք անիմաստ գտաք Ձեր ներկայությունը քաղաքական  դաշտում, կամ՝ Ձեզ որևէ պաշտոն են առաջարկել:

- Վաղը չէ մյուս օրը կառավարության նիստերի դահլիճում ես բացահայտումներ կներկայացնեմ: