Լուկաշենկոն ընտրում է Պեկինը. 2 երկրները 11 մլրդ դոլարի պայմանագրեր են կնքել. «Նեզավիսիմայա գազետա»

11:54 • 03.10.16

Բելառուսը հայտարարել է Չինաստանի հետ փոխհարաբերությունների նոր փուլի մասին: Չինաստանի հետ Բելառուսը ստեղծելու է համատեղ ձեռնարկություններ, վարելու է գիտական հետազոտություններ, այնտեղ մթերք է վաճառելու: Այդ երկրի հետ Ալեքսանդր Լուկաշենկոն կապում է անգամ Բելառուսի անկախության ապահովումը, գրում է «Независимая Газета»-ն:

 

«Պոտենցիալ, հնարավոր և իրական պայմանագրերի ընդհանուր արժեքը, որ պետք է այժմ իրականացնենք, մոտ 11 միլիարդ դոլար է»,- հայտարարել է Չինաստանում Բելառուսի դեսպան Կիրիլ Ռուդին՝ ներկայացնելով Չինաստան Ալեքսանդր Լուկաշենկոյի այցի արդյունքները:

 

Դիվանագետը պատմել է, որ երկրների միջև համագործակցությունը նոր փուլի է անցնում՝ «վարկայինից» «ներդրումայինի», ինչը կարտահայտվի նրանում, որ Չինաստանը կսկսի ներդրումներ անել Բելառուսում:

 

Ինչպես գրում է լրատվամիջոցը, Լուկաշենկոն բացատրել է, թե ինչու է նախընտրում ռազմավարական համագործակցություն կառուցել Չինաստանի հետ, այլ ոչ հարևան երկրների:

«Առաջին հերթին այն պատճառով, որ 25 տարվա ընթացքում դուք երբեք մեր առաջ նախապայմաններ չեք դրել: Դուք միշտ ազնիվ եք կառուցել հարաբերությունները՝ հավասար հիմունքներով: Կլինի ուժեղ Չինաստան՝ կլինի նաև ինքնիշխան և անկախ Բելառուս»,- հայտարարել է Լուկաշենկոն:

 

Շատ փորձագետներ ենթադրում են, որ Լուկաշենկոն որոշել է շեշտը դնել Չինաստանի հետ ռազմավարական աշխարհաքաղաքական գործընկերության վրա` Մոսկվայի հետ հարաբերությունների վատթարացման պատճառով: Նրանց կարծիքով՝ Մինսկի հաշվարկն այն է, որ եթե Չինաստանը մեծ ներդրումներ կատարի Բելառուսում, ապա ոչ մեկին «թույլ չի տա նեղացնել իրեն»:

 

Վերջին ժամանակների իրադարձությունները վկայում են, որ Լուկաշենկոն զուր չէ անհանգստանում: Դաշնակիցների միջև հարաբերությունները կտրուկ վատթարանում են: Խնդիրները, որոնք Մոսկվան և Մինսկը երկար ժամանակ չէին հրապարակում, սկսել են ի հայտ գալ: Ինչպես հաղորդվել է ավելի վաղ, Լուկաշենկոն հայտարարել է, որ Ռուսաստանը ճնշում է գործադրում երկրի վրա, և սպառնացել է վերանայել ինտեգրացիոն նախագծերին իր մասնակցությունը: Մինսկը համաձայն չէ ՌԴ-ից մատակարարվող գազի գնի հետ և պահանջում է նվազեցնել այն:

 

Ավելի վաղ «Независимая Газета»-ն գրել էր, որ Լուկաշենկոն գնում է Պեկին՝ գումարի հետևից։ Լրատվամիջոցը նշել էր, որ Բելառուսի նախագահը որոշել է բարելավել երկրում տնտեսական վիճակը Չինաստանի օգնությամբ: