Կոլումբիայի քաղաքացիները հանրաքվեի ժամանակ «ոչ» են ասել ապստամբների հետ կնքված խաղաղության համաձայնագրին

12:33 • 03.10.16

Հոկտեմբերի 2-ին Կոլումբիայում կայացած հանրաքվեի արդյունքների համաձայն՝ երկրի քաղաքացիները դեմ են արտահայտվել «Կոլումբիայի հեղափոխական զինված ուժեր» ձախակողմյան խմբավորման հետ իշխանությունների կնքած հաշտության համաձայնագրին:

 

Ինչպես հայտնում է lenta.ru-ն, հանրաքվեի մասնակիցների ձայների հաշվարկից հետո «կողմ» արտահայտվածները կազմել են 49.76 %, իսկ «դեմ»՝ 50.23%:

 

Սակայն հանրաքվեին նախորդած սոցհարցումների արդյունքները վկայում էին, որ համաձայնագրի կողմնակիցները համոզիչ հաղթանակ են տանելու:

 

Համաձայնագրի ընդդիմախոսների ճակատի ղեկավար Ալվարո Ուրիբեն, որը եղել է երկրի նախկին նախագահը, կարծում է, որ ապստամբները պետք է բանտարկվեն, այլ ոչ թե տեղ զբաղեցնեն Կոնգրեսում:

 

Ինչպես ավելի վաղ հայտնել էր Tert.am-ը, սեպտեմբերի 26-ին Կոլումբիայի իշխանությունները հաշտության պատմական համաձայնագիր են կնքել «Կոլումբիայի հեղափոխական զինված ուժեր» խմբավորման անդամների հետ:

 

Փաստաթղթի ստորագրումը տեղի է ունեցել կոլումբիական Կարտախենա քաղաքում: Հայտնի է, որ պատմական փաստաթղթում իրենց ստորագրություններն են դրել երկրի նախագահ Խուան Մանուել Սանտոսն ու ապստամբների նախկին առաջնորդ Ռոդրիգո Լոնդոնյո Էչևերին:

 

Նշվում է, որ հաշտության համաձայնագիրը կնքվել է 52 տարի տևած քաղաքացիական պատերազմից հետո: Այդ ընթացքում զոհվել է 260.000 մարդ, ևս 6 մլն-ը ստիպված են եղել լքել իրենց տները: