Վրաստանում մեկնարկել են խորհրդարանական ընտրությունները. Ախալքալաքում պայքարում է 8 հայ թեկնածու

09:57 • 08.10.16

Այսօր՝ հոկտեմբերի 8-ին, ժամը 08:00-ին Վրաստանում բացվել են բոլոր ընտրատեղամասերը և մեկնարկել են խորհրդարանական ընտրությունները:

Վրաստանի արդարադատության նախարարության փոխանցած վերջին  տվյալների համաձայն՝  երկրում  3 մլն 473 հազ. 316 ընտրող կա: Խորհրդարանական ընտրություններին մասնակցում են 29 կուսակցություն/բլոկ։
 
Խորհրդարանում հայտնվելու համար կուսակցությունները պետք է հաղթահարեն 5% ընտրական շեմը, իսկ մեծամասնական ընտրատարածքներում 50%-ից ավելի ձայն հավաքող թեկնածուն կլինի հաղթողը:

Վրաստանի խորհրդարանի 150 պատգամավորներից  77-ն ընտրվելու համամասնական ընտրակարգով, 73-ը՝ մեծամասնականով:

Կենտրոնական ընտրական հանձնաժողովի տվյալների համաձայն՝Վրաստանում 73 միամանդատ ընտրատարածքներից 12-ում մեծամասնություն են կազմում էթնիկ փոքրամասնությունները:

Ներկայիս խորհրդարանում 3  հայ կա՝ Ռուսլան Պողոսյանը, Հենզել Մկոյանն ու Սամվել  Պետրոսյանը, որն այս ընտրություններին չի առաջադրվել:

Ախալքալաքի և Նինոծմինդայի մեծամասնական ընտրատարածքում 8 թեկնածու է պայքարում, սակայն հիմնական պայքարն ընթանում է ընդդիմության թեկնածու, Նինոծմինդայի նախկին ոստիկանապետ Արսեն Կարապետյանի և իշխանության թեկնածու, գործող պատգամավոր Հենզել Մկոյանի միջև, ով «Միացյալ ազգային շարժումը» լքել է  2012-ին:

Ախալքալաքում մեծամասնական ընտրատարածքում «Վրացական երազանքից» առաջադրվել է Հենզել Մկոյանը, «Միացյալ ազգային շարժումից»՝ Արսեն Կարապետյանը, «Ազգային ֆորումից»՝ Արմենակ Փոլորչյանը, ինքնաառաջադրվել են Ռոբերտ Ջաղացպանյանը և Արտաշես Պալանջյանը, «Դավիթ Թարխան Մոուրավի, Իրմա Ինաշվիլի, Վրաստանի հայրենասերների դաշինքը, միացյալ ընդդիմությունից» առաջադրվել է Մերուժան Կարախանյանը, «Պաատա Բուրճուլաձեի – Պետությունը Ժողովրդի համար» բլոկի կողմից՝ Շաքրո Այվազյանը, «Հանրապետական կուսակցության» կողմից առաջադրվել է Աշոտ Սահարյանը:

Ընդհանուր առմամբ, Վրաստանում տարբեր քաղաքական ուժերի կողմից, Tert.am-ի հաշվարկով, մասնակցում է 26 հայ թեկնածու:

Ընտրատեղամասերը կփակվեն 20:00-ին:

Նշենք, որ 2015 թվականին  Վրաստանի խորհրդարանի ընդունած Ընտրական օրենսգրքի փոփոխություններով պայմանավորված որոշ ընտրատեղամասեր միավորվել են մեկ ընտրատարածքում ընտրողների 47 000 թիվն ապահովելու համար: Սրանով պայմանավորված, հայաբնակ Ախալքալաքն ու Նինոծմինդան միավորվել են մեկ ընտրատարածքում և հետևաբար ունենալու են մեկ մեծամասնական թեկնածու: