Ես ընտրել եմ արժանավորին. մեծամասնական թեկնածու Հենզել Մկոյանը կատարեց իր ընտրությունը
Վրաստանում խորհրդարանական ընտրություններին Ախալքալաքի և Նինոծմինդայի մեծամասնական թեկնածու Հենզել Մկոյանն ընտրել է արժանավորին։ Այս մասին իր քվեն կատարելուց հետո լրագրողների հետ զրույցում ասաց գործող պատգամավոր Հենզել Մկոյանը:
«Ընտրել եմ արժանավորին և «Վրացական երազանք» կուսակցությանը, որը երիտասարդ կուսակցություն է և չորս տարվա մեջ շատ աշխատանքներ է կատարել և շատ աշխատանքներ է կատարելու: Դրա համար ես կարծում եմ, որ այսօր մեր ժողովուրդը պետք է գա և իր ձայնը տա «Վրացական երազանք» կուսակցությանը»,-ասաց Մկոյանը:
Գործող պատգամավորը նշեց, որ այսօր քաղաքացիների պարտքն է մասնակցել ընտրություններին, որովհետև խորհրդարանական ընտրությունները կարևոր են Վրաստանի համար:
Հենզել Մկոյանի կարծիքով՝ այս տարի, ի տարբերություն նախորդ ընտրությունների, մասնակցությունն առավել ակտիվ է:
Իշխող կուսակցության թեկնածուն համամիտ էր այն ձևակերպման հետ, որ այս ընտրությունները Ջավախքում ամենամրցակցայինն են.« Մարդիկ ճիշտ են նկատում, մրցակցային է»:
Հարցին, թե Մկոյանն ո՞ւմ է համարում իրեն մրցակիցը, պատգամավորը կարճ պատասխան տվեց՝ ով հաղթի:
Հիշեցնենք, որ այսօր Վրաստանում խորհրդարանական ընտրություններ են:
Նշենք, որ 2015 թվականին Վրաստանի խորհրդարանի ընդունած Ընտրական օրենսգրքի փոփոխություններով պայմանավորված որոշ ընտրատեղամասեր միավորվել են մեկ ընտրատարածքում ընտրողների 47 000 թիվն ապահովելու համար: Սրանով պայմանավորված, հայաբնակ Ախալքալաքն ու Նինոծմինդան միավորվել են մեկ ընտրատարածքում և, հետևաբար, ունենալու են մեկ մեծամասնական թեկնածու:










