«Հայաստան» հիմնադրամը համայնքային կենտրոն է կառուցում Արցախի Հադրութի շրջանում

16:14 • 11.10.16

 

«Հայաստան» համահայկական հիմնադրամն Արցախի Հադրութի շրջան Տումի գյուղում նոր համայնքային կենտրոն է կառուցումը՝ Ֆրանսիայի իր տեղական մարմնի հովանավորությամբ:

Ինչպես հայտնում են հիմնադրամի մամուլի ծառայությունից, ծրագիրը համաֆինանսավորում է ԼՂՀ կառավարությունը:

Կարևորելով համայնքային կենտրոնների դերակատարումը համայնքի կյանքում՝ վերջին երեք տարիների ընթացքում, այլ ծրագրերին զուգահեռ, ֆրանսահայերը հովանավորել են մեկ տասնյակից ավել կենտրոնների կառուցումն Արցախում:

«Ֆրանսահայ համայնքի կողմից կենտրոնների կառուցման շարունակական նախաձեռնությունը վկայում է, որ դրանք օգնում են առավել համակարգված լուծում տալ բնակիչների առօրյա խնդիրներին եւ դրական լիցք հաղորդում համայնքի կյանքին»,- նշում է գործադիր տնօրեն Արա Վարդանյանը:

Երկհարկանի կառույցը մեկ հարկի տակ կկենտրոնացնի գյուղապետարանը, բուժկետը, գրադարանը, խաղասրահն ու համակարգչային սենյակը: 150 հանդիսատեսի համար կից կառուցվող դահլիճն էլ կծառայի համայնքի ամենատարբեր միջոցառումների անցկացմանը:

«Վերջապես կկարողանանք համայնքի հավաքներն անցկացնել տեղում՝ առանց գյուղից հեռանալու: Իսկ արդի պայմաններով բուժկետ ունենալը կրկնակի անհրաժեշտություն է մեզ համար, քանի որ գյուղը Հադրութից գտնվում է 31կմ հեռավորության վրա, և հաճախ անհրաժեշտ է լինում այստեղ ծնունդներ ընդունել»,- նշում է գյուղապետ Էդիկ Մոսիյանը:

768 բնակիչ ունեցող Տումիում Հիմնադրամը տարիներ առաջ նաև վերանորոգել է ջրամատակարարման ցանցը, կահավորել գյուղի դպրոցն ու տրամադրել մանկապարտեզի գույքի մի մասը:

Տումին Արցախի հնագույն գյուղերից է: Այստեղ պահպանված են մի շարք պատմական և մշակութային կոթողներ, հուշարձանների մասունքներ: