ԱՄՆ-ում «Մեթյու» փոթորիկը շարունակում է քաոսային իրավիճակ ստեղծել որոշ նահանգներում. զոհերի թիվը հասել է 33-ի (լուսանկարներ)
Միացյալ Նահանգների արևելյան ափը պատուհասած «Մեթյու» փոթորիկը շարունակում է քաոսային իրավիճակ ստեղծել որոշ նահանգներում, որտեղ զոհերի թիվն արդեն հասել է 33-ի:
Ինչպես հայտնում է The Guardian-ը, իրավիճակն առավել բարդ է Հյուսիսային Կարոլինա նահանգում, որտեղ փոթորիկը դարձել է զանգվածային հեղեղումների պատճառ: Ըստ նահանգային իշխանությունների՝ ջրի մակարդակը շարունակում է բարձրանալ: Նրանք նաև նախազգուշացրել են, որ վատագույն օրերը դեռ առջևում են:

Աղբյուրը մանրամասնում է, որ զոհերի ամենամեծ թիվը գրանցվել է Ֆլորիդայում (12 հոգի). բնական տարերքի հետևանքով մահվան դեպքեր են գրանցվել նաև Հարավային և Հյուսիսային Կարոլինա, Ջորջիա և Վիրջինիա նահանգներում:
Նշվում է, որ «Մեթյու» փոթորիկը 7.5 մլրդ դոլարի վնաս է պատճառել ԱՄՆ-ի իշխանություններին:
Բրիտանական պարբերականը հիշեցնում է, որ նախքան ԱՄՆ հասնելը՝ փոթորիկը մոլեգնել է Հաիթիում՝ դառնալով առնվազն 1.000 մարդու մահվան ու զանգվածային ավերածությունների պատճառ:













