Գյումրիում խուլիգանության վերածված ավտովթարից հետո մանկապարտեզի բակ են նետել ատրճանակ

16:51 • 14.10.16

Գյումրիում խուլիգանության վերածված ավտովթարից հետո մանկապարտեզի բակ են նետել ատրճանակ։

Այս մասին հայտնում են ՀՀ քննչական կոմիտեի լրատվական ծառայությունից։

Հիշեցնենք, որ այսօր հոկտեմբերի 14-ին՝ ժամը 14:00-ի սահմաններում, Գյումրի քաղաքում տեղի է ունեցել ավտովթար՝ «ԲՄՎ» և «Մերսեդես» մակնիշի ավտոմեքենաների մասնակցությամբ, որի պատճառով վիճաբանություն է առաջացել նշված երկու ավտոմեքենաների վարորդների միջև։

Նախնական տվյալներով՝ վիճաբանությունը վերածվել է խմբակային խուլիգանության, որի որոշ մասնակիցների մոտ եղել է նաև զենք:

Ահազանգի հիման վրա՝ դեպքի վայր է մեկնել քննչական-օպերատիվ խումբը՝ Շիրակի մարզային քննչական վարչության պետի պաշտոնակատար Սահակ Մկրտչյանի գլխավորությամբ։ Դեպքի վայրի զննությամբ հայտնաբերվել է գազային ատրճանակի 4 հատ չկրակված փամփուշտ։

Միջադեպի մասնակիցներից մեկը, դիմելով փախուստի, հարևանությամբ գործող մանկապարտեզի բակ է նետել ՏՏ տեսակի ատրճանակ:

Ձեռնարկվում են անհրաժեշտ գործողություններ՝ դեպքի բոլոր հանգամանքները և մասնակիցների շրջանակը պարզելու ուղղությամբ։