Ահաբեկիչները հեռանում են Սիրիայից և Իրաքից, քանի որ ԻՊ-ը դիրքեր է կորցնում. ՄԱԿ
«Իսլամական պետություն» ահաբեկչական խմբավորման անդամները դիրքեր և ֆինանսական աջակցություն են կորցնում Սիրիայում և Իրաքում, ինչը նրանց դրդում է վերադառնալ իրենց ծագման երկրներ: Այդ մասին ՄԱԿ-ի գլխավոր քարտուղարի քաղաքական հարցերով օգնական Ջեֆրի Ֆելտմանը հայտարարել է ՄԱԿ-ի Անվտանգության խորհրդի նիստի ժամանակ, գրում է «ՌԻԱ Նովոստի»-ն:
«Իրաքում և Սիրիայում տարածքներ պահելու և կեղծ պետության գոյության հետ կապված ԻՊ-ի նախկին հաջողություններին մարտահրավեր է նետվել որոշ անդամ երկրների ջանքերի շնորհիվ»,- հայտարարել է Ֆելտմանը ՄԱԿ-ի Անվտանգության խորհրդում:
Ընդ որում՝ նա նշել է, որ ԻՊ-ի կողմից վտանգը «դեռ զգալի է մնում և դիվերսիֆիկացվում է»:
«Սիրիայում և Իրաքում ԻՊ-ի վրա գործադրվող ռազմական ճնշումը հանգեցրել է իրենց ծագման երկրներ, մասնավորապես՝ Եվրոպա և Հյուսիսային Աֆրիկա վերադարձած ահաբեկիչների թվի աճին»,- ասել է Ֆելտմանը:
Ավելի վաղ Սիրիայի նախագահ Բաշար ալ Ասադը ռուսական «Կոմսոմոլսկայա Պրավդա» պարբերականին տված հարցազրույցում Թուրքիային անվանել է «Իսլամական պետություն» (ԻՊ) ահաբեկչական խմբավորման ստեղծող:
«Նրանք (թուրքերը-Tert.am) ստեղծել են ԻՊ-ը, ապահովել նրանց թիկունքից աջակցությամբ, և հենց նրանք են թույլ տվել ահաբեկիչներին վաճառել մեր նավթը Թուրքիայի տարածքով՝ Էրդողանի որդու ու նրան մոտ շրջապատի մասնակցությամբ: Նրանք բոլորը կապված են ԻՊ-ի հետ: Ամբողջ աշխարհը գիտի այդ մասին»,-ասել է Սիրիայի ղեկավարը:
Բացի այդ, Ասադը մանրամասնել է, թե ինչու ահաբեկիչները չեն հարձակվում Իսրայելի վրա: Նախագահի խոսքով՝ Իսրայելն աջակցում է ցանկացած զինված ահաբեկչի, որը քանդում է Սիրիան:










