ԵՏՄ-ում մինչև տարվա վերջ կստորագրվի մաքսային միասնական կանոնակարգ. Տիգրան Սարգսյան

11:06 • 14.10.16

Եվրասիական տնտեսական միությունը հնարավորություն է տալիս բիզնեսին գտնել գործընկերներ, համագործակցել անդամ-պետությունների հետ: Այս մասին այսօր Երևանում ընթացող Եվրասիական ինտեգրացիայի առաջին համաժողովի ժամանակ հայտարարեց ԵՏՄ-ի գործադիր մարմնի նախագահ Տիգրան Սարգսյանը:

«ԵՏՄ-ն ընդլայնեց անդամ-պետությունների տնտեսական սահմանները՝ մինչև 7-րդ մայրցամաք: Այն ստեղծեց խորը, ընդգրկուն 200 միլիոնանոց տնտեսություն՝ առանց մաքսային սահմանների: Հեշտացան բիզնեսի ստեղծման կանոնները՝ մի շարք ոլորտներում: ԵՏՄ-ում իրականություն են ծառայությունների ազատությունները, կապիտալի, մարդկային ռեսուրսների: Իսկ սա նշանակում է, որ ինտեգրացիայի շնորհիվ բիզնեսը ստանում է գործունեության լայն հնարավորություն ու կարող է աշխատել ինչպես իր տանը»,- նշեց Տիգրան Սարգսյանը:

ԵՏՄ գործադիր մարմնի նախագահն ասաց, որ միությունն ամեն ինչ անում է մաքսիմալ կոմֆորտ վերահսկողություն, ադմինիստրատիվ հեշտ կանոնակարգ հաստատելու ուղղությամբ:

«Տարվա վերջում պետք է գործի դրվեն դեղորայքի միասնական շուկայի, էներգետիկայի, գազի, նավթի, նավթամթերքի միասնական շուկաները»,- հայտնեց Տիգրան Սարգսյանը՝ հույս հայտնելով, որ ԵՏՄ-ն մինչև տարվա վերջ կստորագրի մաքսային միասնական կանոնակարգ՝ բիզնեսի շահերից ելնելով:

«Ամեն ինչ անում ենք, որ փաստաթուղթը ստորագրվի դեկտեմբերին՝ միության նախագահների հանդիպմանն ընդառաջ: Սա պրոգրեսիվ փաստաթուղթ է, որը կհեշտացնի մաքսային կանոնակարգերը, կստեղծվի բիզնեսի համար լավ միջավայր»,- նշեց նա:

Տիգրան Սարգսյանի փոխանցմամբ՝ աշխատանք է տարվում Եվրասիական տնտեսական միության ու Մետաքսի ճանապարհի վերականգնման ուղղությամբ: Առևտրատնտեսական համաձայնություններ են մշակում Հնդկաստանի, Իրանի, Եգիպտոսի, Կոմբոջիայի, Սինգապուրի և այլ պետությունների հետ: Իսկ Վիետնամի հետ, ըստ նրա, արդեն իսկ ստորագրվել է դյուրացված համագործակցության փաստաթուղթ: