Ռուսական նավը կրակ է բացել հյուսիսկորեական մաքսանենգ նավի ուղղությամբ. կա 1 զոհ և 8 վիրավոր
Ճապոնական ծովում ռուս սահմանապահները 9 մարդու են վիրավորել հյուսիսկորեական մաքսանենգ ձկնորսական նավի անձնակազմից, որոնցից մեկն ավելի ուշ մահացել է: Այս մասին հաղորդում է INTERFAX.RU-ն` մեջբերելով ՌԴ Անվտանգության դաշնային ծառայության հաղորդագրությունը:
«Զենքին բռնի ուժով տիրանալու փորձը կանխելու և հյուսիսկորեական թիմի կողմից հարձակման դեպքում ՌԴ Անվտանգության դաշնային ծառայության աշխատակիցներին պաշտպանելու նպատակով վերջիններս թեթև հրազենից նախ նախազգուշական, ապա մարտական կրակահերթ են բացել»,- ասվում է հաղորդագրության մեջ:
Նշվում է, որ կանգնեցված նավի անձնակազմի անօրինական գործողությունների հետևանքով ռուսական սահմանապահ նավի հետախուզական խմբի անդամներից մեկը վիրավորվել է գլխից:
Ձկնորսական նավի անձնակազմը բաղկացած է եղել Հս. Կորեայի 48 քաղաքացիներից:
Կատարվածի մասին տեղեկացվել է Վլադիվոստոկում Հս. Կորեայի գլխավոր հյուպատոսությունը:










