Իսրայելում էլ արգելվեց օդանավով Galaxy Note 7 սմարթֆոնի տեղափոխումը

23:41 • 16.10.16

 

Իսրայելի ավիացիոն իշխանություններն արգելել են երկրից թռչող ուղևորատար ինքնաթիռներով իրենց հետ տանել Samsung Galaxy Note 7 սմարթֆոնները, որոնց հետ կապված օդանավում ինքնաբռնկման մի շարք դեպքեր են գրանցվել:

Ինչպես հաղորդում է РИА Новости-ն` վկայակոչելով տեղի հեռուստատեսությունը, երկրի Քաղավիացիայի վարչությունը հետևել է մի շարք արտասահմանյան երկրների իրենց գործընկերների օրինակին, ինչպես օրինակ` ԱՄՆ-ի, որտեղ նման որոշում է կայացվել նախօրեին:

Նշվում է, որ արգելքը խախտողներին տուգանք և սմարթֆոնի առգրավում է սպառնում: Մինչ այս Իսրայելում թույլատրվում էր սմարթֆոնները տեղափոխել ձեռքի ուղեբեռում, սակայն անջատված վիճակում:

Հիշեցնենք, որ Samsung Electronics-ը երեքշաբթի օրվանից դադարեցրել Galaxy Note 7 սմարթֆոնի արտադրությունը մարտկոցների ինքնաբռնկման մի շարք դեպքերից հետո: