Հալեպում 8-ժամյա հրադադարը բավարար չէ. Շտայնմայեր
Գերմանիայի արտգործնախարար Ֆրանկ-Վալտեր Շտայնմայերը կարծում է, որ Հալեպում հրադադարի նախաձեռնությունը, որը պատկանում է Ռուսաստանին, կարող է երկարաժամկետ հրադադարի սկիզբ դառնալ, բայց հրադադարի մի քանի ժամը բավարար չէ, հայտնում է «ՌԻԱ Նովոստի»-ն:
Երեքշաբթի առավոտյան ՌԴ պաշտպանության նախարար Սերգեյ Շոյգուն հայտարարել է, որ հոկտեմբերի 18-ին առավոտյան ժամը 10-ից դադարեցվում են Հալեպում Ռուսաստանի օդատիեզերական ուժերի ավիացիայի և Սիրիայի ռազմաօդային ուժերի հարվածները: Դա անհրաժեշտ է հոկտեմբերի 20-ին «մարդասիրական դադար» սահմանելու համար:
Երկուշաբթի ՌԴ զինված ուժերի գլխավոր շտաբի գլխավոր օպերատիվ վարչության ղեկավար գեներալ-լեյտենանտ Սերգեյ Ռուդկոյը հայտարարել էր, որ «մարդասիրական դադարը» կսկսի գործել Հալեպում հոկտեմբերի 20-ին, որպեսզի հնարավորություն տրվի դուրս գալ քաղաքից ինչպես գրոհայիններին, այնպես էլ խաղաղ բնակիչներին: Նրա խոսքով՝ առավոտյան ժամը 8։00-ից մինչև 16.00-ն Հալեպում ՌԴ օդուժը և սիրիական կառավարական զորքերը կդադարեն հարվածներ հասցնել:
«Մի քանի ժամով ռազմական գործողությունների դադարեցումը Հալեպում, որի մասին հայտարարել է Մոսկվան, կարող էր միայն սկիզբը լինել: Ութը ժամը բավարար չէ Հալեպում պաշարված մարդկանց այդքան անհրաժեշտ մարդասիրական օգնությունը հասցնելու համար»,- ասել է նախարարը:










