Ասանժին զրկել են համացանցից օգտվելու հնարավորությունից

09:02 • 19.10.16

Սկանդալային նյութերի հրապարակմամբ զբաղվող WikiLeaks կայքի հիմնադիր Ջուլիան Ասանժը, որն արդեն 4 տարի է՝ ապաստանել է Լոնդոնում Էկվադորի դեսպանատանը, զրկվել է համացանցից օգտվելու հնարավորությունից:

 

Ինչպես հայտնում է Al Arabiya-ն, Էկվադորի իշխանություններն անջատել են ինտերնետ կապն այն բանից հետո, երբ Ասանժն ԱՄՆ-ին ու Մեծ Բրիտանիային վերաբերող ոչ ցանկալի նյութեր է հրապարակել:

 

«Մենք հաստատում ենք, որ Էկվադորի իշխանությունները շաբաթ օրվանից՝ Goldman Sachs-ի համար Հիլարի Քլինթոնի ելույթների տեքստերի հրապարակումից հետո, արգելափակել են Ասանժի հասանելիությունը համացանցին»,-ասվում է WikiLeaks-ի տարածած հայտարարությունում:

 

Էկվադորի կառավարությունը համացանցի հետ կապված միջադեպը չի մեկնաբանել, սակայն երկրի արտաքին քաղաքական գերատեսչության ղեկավար Գիլիոմ Լոնգն ասել է, որ Ասանժը շարունակում է մնալ կառավարության պաշտպանության ներքո:

 

Ինչպես նշում է Tert.am-ը, Ասանժի հարցաքննությունը հետաձգվել է ու կկայանա նոյեմբերի 14-ին: Հայտնի  է, որ շվեդ քննիչները պատրաստվում են Ասանժին հարցաքննել Էկվադորի դեսպանատան շենքում, որից դուրս գալու դեպքում նրան անմիջապես կձերբակալեն:

 

«Նա Մեծ Բրիտանիայում Էկվադորի դեսպանի միջոցով գրել է համապատասխան հարցում, որում ներկայացրել է իր պատճառաբանությունները՝ կապված հարցաքննության ընթացքում իր պաշտպանության երաշխիքների հետ», — նշվում է այս կապակցությամբ տարածված հայտարարությունում:

 

Հիշեցնենք, որ 2012թ.-ի հունիսի 19-ին Ասանժն ապաստան էր խնդրել Լոնդոնում Էկվադորի դիվանագիտական առաքելությունից՝ խուսափելու համար Շվեդիա արտահանձնումից, որտեղ նրան կասկածում են սեռական հանցագործությունների համար: Ասանժը հերքում է մեղադրանքները: Նա մտավախություն ունի, որ Շվեդիան իրեն կարտահանձնի ԱՄՆ-ին, որտեղ նրան տևական ազատազրկման ժամկետ է սպառնում Պետդեպի գաղտնի փաստաթղթերի գաղտնազերծման համար: