Լևոն Տեր-Պետրոսյանը 2 առաջարկ է ներկայացրել՝ ՀՀ կառավարության ծրագրում ընդգրկելու համար. iLur.am
ՀՀ առաջին նախագահ Լևոն Տեր-Պետրոսյանը երկու առաջարկ է ներկայացրել ՀՀ վարչապետ Կարեն Կարապետյանին Կառավարության ծրագրում ներառելու համար՝ կարծիք հայտնելով, որ ամենահրատապ խնդիրը պետք է լինի կոռուպցիայի դեմ պայքարը, քանի որ «Հայաստանի բոլոր չարիքների արմատը կոռուպցիան է»։
Այս մասին հայտնում է iLur.am կայքը։
Լևոն Տեր-Պետրոսյանը հայտարարել է, որ կասկած չունի, որ Կարեն Կարապետյանը վարչապետի պաշտոնն ստանձնել է երկրի տնտեսական վիճակն առողջացնելու ազնիվ մղումով. «Կարծում եմ, որ նա առաջին հերթին պետք է նկատի ունենա հետևյալ անժխտելի իրողությունը.
Հայաստանի բոլոր չարիքների` սոցիալական ծանրագույն վիճակի, բնակչության աղքատության, զանգվածային արտագաղթի, բանակի թերզինվածության, ապօրինի ընտրությունների, արդարադատության չգոյության, ժողովրդավարության և մարդու իրավունքների ոտնահարման արմատը կոռուպցիան է` պետական պաշտոնյաների կողմից ազգային հարստության համատարած ու անհագ թալանը:
Ուստի կառավարության առջև կանգնած ամենահրատապ խնդիրը պետք է լինի կոռուպցիայի դեմ պայքարի ոչ թե ձևական, այլ հիրավի արդյունավետ մեխանիզմների կիրառումը, ինչի համար անհրաժեշտ է.
1. Վերացնել նախարարությունների, պետական այլևայլ գերատեսչությունների, ինչպեսև տեղական ինքնակառավարման մարմինների արտաբյուջետային հաշիվներն ու հիմնադրամները:
2. Անմիջապես վավերացնել ՄԱԿ-ի Հակակոռուպցիոն կոնվենցիայի` պետական պաշտոնյաների ապօրինի հարստացման քրեականացմանը վերաբերող 20-րդ հոդվածը՝ օժտված նաև հետադարձ ուժով»:
Առաջին նախագահը ընդգծել է, որ եթե կառավարության ծրագրում այս երկու դրույթները չընդգրկվեն, ապա Հայաստանի տնտեսական վիճակի բարելավման ու զարգացման հույս փայփայելն անիմաստ կդառնա։
Մանրամասները՝ սկզբնաղբյուր կայքում։










