Մոսկվան մտահոգված է Սիրիայի տարածքում Թուրքիայի օդային հարվածների առնչությամբ
Մոսկվան մտահոգված է Սիրիայի տարածքում Թուրքիայի հասցրած օդային հարվածների առնչությամբ: Այդ մասին ուրբաթ հայտարարել է ՌԴ արտգործնախարար Սերգեյ Լավրովը, գրում է «ՌԻԱ Նովոստի»-ն:
«Ինչ վերաբերում է Սիրիայի հյուսիսային շրջաններում թուրքական ռազմաօդային ուժերի իրականացրած օդային հարվածների մասին հաղորդումներին, մենք լսել ենք դրանց մասին: Մենք չափազանց անհանգստացած ենք նրանից, թե ինչ է տեղի ունենում: Ինչպես ես հասկանում եմ, խոսքը քրդերով բնակեցված շրջանների վրա օդային հարվածների մասին է»,- ասել է նա Մոսկվայում կայացած մամուլի ասուլիսի ժամանակ՝ պատասխանելով հարցին, թե ինչպես կարող են Սիրիայի տարածքում Թուրքիայի օդային հարվածներն ազդել Հալեպի շուրջ իրավիճակի վրա:
Լավրովի խոսքով՝ «Թուրքիան այն կոալիցիայի անդամն է, որը ստեղծել է Միացյալ Նահանգները՝ հստակ հայտարարելով, որ կոալիցիան ստեղծվում է մի նպատակով՝ պայքարել ԻՊ-ի և «Ջեբհաթ ան- Նուսրա»-ի դեմ»։
«Ելնում եմ նրանից, որ Միացյալ Նահանգները, որպես այդ կոալիցիայի ղեկավար, կանի ամեն ինչ հայտարարված նպատակի շրջանակում մնալու համար»,- նշել է ՌԴ արտգործնախարարը:










