Կոտայքի վթարից տուժածներից երկուսը դուրս են գրվել հիվանդանոցից, մեկը շարունակում է բուժումը. գլխավոր բժիշկ
Հոկտեմբերի 18-ին Գ.Ստեփանյանի վարած «Մերսեդես-Սպրինտեր» մակնիշի 35CT940 համարանիշի ավտոմեքենան Երևան-Սևան ավտոճանապարհի 45 կմ հատվածում տեղի ունեցած վթարի հետևանքով «Հերացի» թիվ 1 հիվանդանոցային համալիր տեղափոխված երեք հիվանդներից երկուսը դուրս են գրվել հիվանդանոցից;
Այս մասին Tert.am-ի հետ զրույցում ասաց «Հերացի» թիվ 1 հիվանդանոցային համալիրի գլխավոր բժիշկ Կարեն Սահակյանը. «Վթարից տուժածներից երկուսը դուրս են գրվել հիվանդանոցից: Այս պահին հիվանդանոցում բուժում է ստանում Հրանտ Գասպարյանը, ով առաջիկա երկու օրերի ընթացքում դուրս կգրվի հիվանդանոցից»:
Հիշեցնենք, որ վթարի հետևանքով 18-ամյա աղջիկ է մահացել՝ Հռիփսիմե Գասպարյանը։ Հոկտեմբերի 18-ին, ժամը 8:10-ի սահմաններում, 1966 թ. ծնված Գագիկ Ս.-ի վարած «Մերսեդես-Սպրինտեր» մակնիշի ավտոմեքենան Երևան-Սևան ճանապարհի 45-րդ կմ-ի հատվածում դուրս է եկել հանդիպակաց գոտի և բախվել 1982 թ. ծնված Շավարշ Գ.-ի վարած «Օպել» մակնիշի ավտոմեքենային: Պատահարի հետևանքով Շավարշ Գ.-ն, «Մերսեդես-Սպրինտեր»-ի ուղևորներ` 1995 թ. ծնված Շահանե Ս.-ն, 1998 թ. ծնված Սոնա Ա.-ն, 1998 թ. ծնված Լուսինե Հ.-ն, 1996 թ. ծնված Հրանտ Գ.-ն, 1996 թ. ծնված Մետաքսյա Մ.-ն մարմնական վնասվածքներով տեղափոխվել են «Հրազդան» բժշկական կենտրոն, իսկ 1998 թ. ծնված Հռիփսիմե Գասպարյանը տեղում մահացել է: Ժամը 11:10-ին նշված վթարի հետևանքով ստացած մարմնական վնասվածքներով «Հրազդան» բժշկական կենտրոն են դիմել նաև «Մերսեդես-Սպրինտեր»-ի ուղևորներ` 1997 թ. ծնված Օքսանա Մ.-ն և 1996 թ. ծնված Կարեն Մ.-ն: Կոտայքի մարզային քննչական վարչությունում կատարվում է նախաքննություն:










