Ռուսաստանում դպրոցի տնօրենի որդին սպանել է նույն դպրոցի ուսուցչուհուն
ՌԴ Պրիմորյեի երկրամասում դպրոցի տնօրենի որդին կասկածվում է նույն դպրոցի ուսուցչուհու սպանության համար: Ինչպես հայտնում է «ՌԻԱ Նովոստի»-ն՝ վկայակոչելով ՌԴ քննչական կոմիտեի երկրամասի քննչական գլխավոր վարչությանը, Պրիմորյեի բնակիչը խոստովանել է անձնական թշնամանքի պատճառով աղջկա սպանության մասին:
«Պոկրովկա գյուղից աղջիկը կորել է հոկտեմբերի 14-ին: Նրա սպանության փաստի առթիվ հարուցվել է քրեական գործ: Չորս օր անց ձերբակալվել է 1998 թվականի ծնված երիտասարդ, նա արդեն կալանքի տակ է: Տղամարդը խոստովանել է իր գործած հանցանքը»,- հայտնել է գերատեսչության ներկայացուցիչը:
Նրա խոսքով՝ երիտասարդը խոստովանել է, որ խեղդել է կնոջը և մարմինը նետել ջուրը, իսկ իրերը՝ այրել: Ընդ որում՝ շարժառիթը եղել է անձնական թշնամանքը:
Իրավապահ մարմիններում գործակալության աղբյուրը պատմել է, որ կասկածյալն այն դպրոցի տնօրենի որդին է, որտեղ դասավանդել է սպանվածը:
«ՌԻԱ Նովոստի» գործակալությանն ուսուցչուհու նախկին ամուսինը պատմել է, որ իր նախկին կինն ու նրա սպանության համար մեղադրվող երիտասարդը հարաբերությունների մեջ են եղել:
«Նրանք հանդիպում էին»,- հայտնել է զրուցակիցը:
Ինչպես հայտնում են տեղի ԶԼՄ-ները, սպանության պատճառը կարող էր լինել փողը: Աղջիկը պարտքով գումար էր տվել երիտասարդին, որը վերջինս չէր ցանկանում վերադարձնել:
Այժմ իրավապահներն ու պատկան մարմինները որոնում են աղջկա մարմինը։










