Վարչապետը հանձնարարեց Գյուղտեխնիկայի պետական տեսչությունը լուծարելու մասին փաթեթ ներկայացնել
Կառավարության նիստի մեկնարկին ՀՀ վարչապետ Կարեն Կարապետյանը գյուղատնտեսության նախարար Իգնատի Առաքելյանին հանձնարարեց մեկ շաբաթյա ժամկետում ներկայացնել նախարարության գյուղատնտեսական տեխնիկայի պետական տեսչությունը լուծարելու մասին փաթեթ:
Չնայած վարչապետն ասաց, որ լուծարումը մեկնաբանելու կարիք չկա, սակայն գյուղատնտեսության նախարարը հարցրեց, թե լուծարումից հետո որ կառույցին է տրվելու այդ տեսչությունը. «Ես տեղյակ չեմ, առաջին անգամ եմ լսում, դրա համար եմ հարցնում»:
Հարցին պատասխանեց Կառավարության աշխատակազմի ղեկավար-նախարար Դավիթ Հարությունյանը, ով ասաց, որ մի շարք տեսչություններում ուսումնասիրություններ են արվել, և այն տեսչությունները, որոնք պետությանն օգուտ չեն տալիս, լուծարվում են, դրանց թվում է նաև գյուղատնտեսական տեխնիկայի պետական տեսչությունը։
«Տեսչության պետհամարանիշների վերաբերյալ գործառույթը տրվում է Ոստիկանությանը, իսկ մյուս մասով տեսչությունը լուծարվում է»,-ասաց նա։










