Կառավարությանն անհրաժեշտ է լինելու քաղաքական կամք, որովհետև կան լոկալ շահեր, որ խանգարելու են. Մ. Շահգելդյան
ԱԺ ճեպազրույցների ժամին «Օրինաց երկիր» խմբակցության քարտուղար Մհեր Շահգելդյանը, խոսելով կառավարության ծրագրի մասին, նշեց, թե կան նոր մոտեցումներ, բայց կան նաև խնդիրներ:
Ըստ նրա՝ բավականին օդիոզ դեմքեր հիմա կառավարությունում չեն, բայց միևնույն է՝ միայն այս տեսանկյունից փոփոխություններ անել հնարավոր չէ:
«Անհրաժեշտ է լինելու քաղաքական կամք, որովհետև կան լոկալ շահեր, որ խանգարելու են»,-շեշտեց պատգամավորը:
Շահգելդյանը խոսեց նաև վերջին օրերի սահմանային լարվածության մասին և տեսակետ հայտնեց, որ ապրիլյան քառօրյա պատերազմին ադրբեջանական ագրեսիայից հետո այսպիսի դիվերսիոն գործողություններ չէին եղել:
«Դա մասնակիորեն կապված էր Ադրբեջանում սահմանադրական հանրաքվեի հետ, որը լրջորեն քննադատվեց դեմոկրատական երկրների կողմից: Ես ենթադրում եմ, որ սա կարող է լինել նաև այն քաղաքականության մի մասը, որ ունի ներքին ու արտաքին կիրառություն: Ենթադրում եմ, որ նավթի գների անկման հետ միասին, իհարկե, նրանց ռեսուրսները պակասում են, բայց Ադրբեջանը փորձում է գտնել ՀՀ պաշտպանության թույլ տեղերը: Սա ռազմական մարտավարության մի մասն է»,-ասաց նա:
ՕԵԿ խմբակցության քարտուղարը նաև անդրադարձավ «Բարգավաճ Հայաստան» կուսակցության նախկին նախագահ Գագիկ Ծառուկյանի՝ քաղաքականություն վերադառնալու հնարավորությանը և նշեց, թե որոշումն իր որոշումն է: Իսկ թե նրա հնարավոր վերադարձը «Հայկական վերածնունդ» կուսակցության համար վտանգ չի ներկայացնո՞ւմ՝ ընտրաձայները խլելու առումով, Շահգելդյանը պատասխանեց, թե ընտրական գործընթացը մրցակցություն է և այնպես չէ, որ ինչ-մեկը կարող է գալ ու խլել իրենց ձայները։
««Հայկական վերածնունդի» ձայները պայմանավորված են մեր աշխատանքով, որը կատարում ենք և նման մտավախություն չունենք»,-ասաց նա:










