Վանաձորի տեխնոլոգիական կենտրոնը շրջադարձային կլինի տեղի տնտեսության զարգացման համար. մարզպետ
Վանաձորի տեխնոլոգիական կենտրոնը տարածաշրջանում փոխելու է կյանքի որակը, օգնելու է բնակիչներին ստեղծել սեփական բիզնեսը և աշխատել: Վանաձորում լրագրողների հետ զրուցում նշեց Ձեռնարկությունների ինկուբատոր հիմնադրամի տնօրեն Բագրատ Ենգիբարյանը ` հավելելով, որ այն մարզում հնարավորություն կստեղծի ներգաղթի, շատ տեխնոլոգիական մասնագետներ կգան աշխատելու:
Նա մանրամասնեց, որ կենտրոնի գործունեության հիմնական ուղղությունները միտված են տեխնիկական և գործարար հմտությունների զարգացմանը, նոր տեխնոլոգիական ընկերությունների ձևավորմանը, արտասահմանյան ներդրումների ներգրավմանը
Հիշեցնենք, այսօր կայացավ Վանաձորի տեխնոլոգիական կենտրոնի պաշտոնական բացման արարողությունը, որին ներկա էին ՀՀ նախագահ Սերժ Սարգսյանը, ՀՀ տրանսպորտի, կապի և տեղեկատվական տեխնոլոգիաների նախարար Վահան Մարտիրոսյանը, Լոռու մարզպետ Արթուր Նալբանդյանը:
Տրանսպորտի, կապի և տեղեկատվական տեխնոլոգիաների նախարար Վահան Մարտիրոսյանն էլ լրագրողների հետ զրուցում նշեց, որ նպատակ է դրված բարձրացնել տեխնոլոգիական կրթության մակարդակը և դա օգտագործել տնտեսության զարգացման գործում:
«Վանաձորի տեխնոլոգիական կենտրոնի կարևորությունը տարածաշրջանում աշխատատեղերի ստեղծումն է, կադրերի պատրաստումը»,- մանրամասնեց նախարարը:
Լուռու մարզպետ Արթուր Նալբանդյանը լրագրողների հետ զրույցում ևս կարևորեց աշխատեղերի ստեղծումը և տեղեկացրեց, որ առաջիկայում կենտրոնում կստեղծվի 150 ուղղակի աշխատատեղեր։ Բացի այդ, 2 տարվա ընթացքում կբացվի մոտ 1000 անուղղակի աշխատատեղ:
«Համոզված են կենտրոնը շրջադարձային է լինելու Վանաձորի տնտեսության զարգացման մեջ, առաջիկա ամիսներին և տարիներին կտեսնեք զգալի դրական տեղաշարժ»,– ասաց Արթուր Նալբանդյանը։
Նա հիշեցրեց, որ մարզն աչքի է ընկնում հանքարդյունաբերությամբ, բայց այդ ոլորտն էլ առանց ՏՏ–ի 21-րդ դարում դժվար է պատկերացնել: «Սա մի շղթա է լինելու, ՏՏ-ն բոլոր ոլորտներին հետ կարող ենք կապել»:
Մարզպետը նաև կարևորեց այն, որ Լոռին շուտով կունենա նաև Թումո կենտրոն:












