Ոստիկանությունում քննարկվել են ՃՈ տուգանքների և կարմիր գծերի մասին Նախագահի հանձնարարականների կատարմանն առնչվող հարցեր

18:35 • 03.11.16

Ոստիկանության պետ Վլադիմիր Գասպարյանն այսօր անցկացրել է աշխատանքային խորհրդակցություն, որին մասնակցել են Ոստիկանության կոլեգիայի անդամներ, կենտրոնական ապարատի վարչությունների և ճանապարհային ոստիկանության ղեկավարներ:

Այս մասին հայտնում են Ոստիկանության լրատվական ծառայությունից։  

Ներկայացնելով նախօրեին հանրապետության Նախագահի հրավիրած խորհրդակցության ժամանակ քննարկված խնդիրները՝  Վլադիմիր Գասպարյանը նշել է այն ոլորտները, որոնց կատարելագործման ուղղությամբ պետք է աշխատի ոստիկանությունը:  

Խոսքը, մասնավորապես, «Սեքյուրիթի  դրիմ» ՍՊԸ և «Փարքինգ սիթի սերվիս»  ՓԲԸ-ի հետ իրավական մեխանիզմների մշակման մասին է՝ նրանց գործառույթները, այդ թվում՝ ֆինանսական հոսքերի տնօրինումն ու կառավարումը պետական և համայնքային կառույցներին փոխանցելու նպատակով:

Նշելով, որ հանձնարարականների կատարումն արդեն իսկ ընթացքի մեջ է, Վլադիմիր Գասպարյանը անդրադարձել է քննարկված երրորդ հարցի՝ Ճանապարհային ոստիկանության համակարգի բարեփոխումների հայեցակարգի մշակմանն ու ժամկետներին:  

Հանձնարարականների առարկայական քննարկումից, համապատասխան ստորաբաժանումների խնդիրների և դրանց կատարման ժամկետների որոշարկումից հետո անդրադարձ  է եղել նաև ճանապարհային երթևեկության կանոնների խախտման համար սահմանված վարչական տուգանքների վճարման գործընթացի առանձնահատկություններին ու կատարելագործման մեխանիզմներին:  

Խորհրդակցության ընթացքում քննարկվել են ճանապարհային ոստիկանի աշխատանքում կոռուպցիոն ռիսկերի նվազեցմանն ուղղված միջոցառումների, երթևեկության կարգավորման ժամանակակից մեխանիզմների մշակման և մի շարք այլ հարցեր:

Խորհրդակցության ավարտին Վլադիմիր Գասպարյանը կոնկրետ հանձնարարականներ է տվել համապատասխան ստորաբաժանումների պատասխանատուներին: