Հայ ուղևորը, որի պատճառով Կիևը հետ էր ուղարկել «Բելավիա»-ի ինքնաթիռը, դատարան է դիմել
«Քաղաքացիական միություն» միջազգային հասարակական կազմակերպության խորհրդի նախագահ, լրագրող և Հայաստանի քաղաքացի Արմեն Մարտիրոսյանը, որի պատճառով բելառուսական «Բելավիա» ավիաընկերության ինքնաթիռը հետ էր վերադարձել Կիևի օդանավակայան, դատի է տվել ուկրաինական իշխանություններին, գրում է «ՌԻԱ Նովոստի»-ն:
Բելառուսական «Բելավիա» ավիաընկերությունն ավելի վաղ հայտնել է, որ ուկրաինական իշխանությունները հոկտեմբերի 21-ին Կիև են վերադարձրել ինքնաթիռը՝ սպառնալով կործանիչներ օդ բարձրացնել: Վայրէջքից հետո Ուկրաինայի իրավապահ մարմիններն օդանավից դուրս են բերել ուղևորին, որը եղել է Հայաստանի քաղաքացի Արմեն Մարտիրոսյանը:
Բելառուսն արդեն բողոք է հայտնել և նոտա հղել Ուկրաինային՝ բելառուսական ինքնաթիռի վերադարձի առնչությամբ: Մինսկը նաև հրապարակել է օդաչուների և ուկրաինացի դիսպետչերների բանակցությունների ձայնագրությունը:
«Հայց է ներկայացվում ուկրաինական իշխանությունների դեմ՝ 2016 թվականի հոկտեմբերի 21-ին «Բելավիա»-ի հետ կապված միջադեպի ժամանակ իմ նկատմամբ ոչ իրավաչափ գործողությունների առնչությամբ»,- գրել է Մարտիրոսյանը Facebook-ի իր էջում:
Նա նշել է, որ իր շահերը դատարանում ներկայացնելու է Ուկրաինայի արդարադատության նախկին նախարար, փաստաբան Ելենա Լուկաշը:
«Ես կներկայացնեմ Արմեն Մարտիրոսյանի շահերն ուկրաինական և եվրոպական դատարաններում: Արմեն Մարտիրոսյանը կարծում է, որ Ուկրաինայի անվտանգության ծառայությունն իր գործողություններով կոպտորեն խախտել է նրա իրավունքները, ազատությունները և շահերը»,- գրել է Լուկաշը Facebook-ի իր էջում:
Ինչպես նշել է Լուկաշը, անվտանգության ծառայությունը հերքում է, որ բելառուսական ինքնաթիռի անձնակազմին դիսպետչերը սպառնացել է կործանիչներ օդ բարձրացնել անգամ դիսպետչերի և օդաչուի բանակցությունների ձայնագրության հրապարակումից հետո:
by24.org-ը հայտնել էր, որ Ուկրաինայի հատուկ ծառայությունները հայ ուղևորին հետախուզման մեջ գտնվող հանցագործի տեղ էին դրել։ Ուկրաինայի անվտանգության ծառայության աշխատակիցները նրանից ներողություն էին խնդրել և թույլ տվել մեկնել Մինսկ։










