Թուրքիայի վարչապետը հայտարարությամբ է հանդես եկել քրդամետ կուսակցության անդամների ձերբակալության առնչությամբ
Թուրքիայի վարչապետ Բինալի Յըլդըրըմը հայտարարել է, որ այսօր Դիարբեքիրում և Անկարայում ձերբակալված Ժողովրդադեմոկրատական կուսակցության 13 անդամների դեմ ոստիկանական գործողությունն օրինական գործընթաց է, գրում է թուրքական timeturk կայքը:
«Թուրքիայի խորհրդարանի 154 պատգամավորի վերաբերյալ անձեռնմխելիությունից զրկելու մասին որոշում է կայացվել, դրանցից 55-ը Ժողովրդադեմոկրատական կուսակցության անդամներ են: Իրավական գործընթացը դեռևս շարունակվում է, դատախազներն ավելի վաղ հարցաքննության են հրավիրել բոլոր 154 պատգամավորներին, չեն ներկայացել միայն Ժողովրդադեմոկրատական կուսակցության անդամները: Նրանցից միայն մեկն է ներկայացել դատախազություն: Ոստիկանության հատուկ ջոկատներն օրենքի սահմաններում բերման են ենթարկում կուսակցության անդամներին, որոնք չեն ուզում ճանաչել այս երկրում օրենքի գերակայությունը», - հայտարարել է Յըլդըրըմը:
Ժողովրդադեմոկրատական կուսակցության համանախագահ Սելահաթթին Դեմիրթաշը, ում ձերբակալել են այսօր Դիարբեքիր քաղաքում գտնվող իր տանը, դատախազությունում հրաժարվել է պատասխանել դատախազի հարցերին:
«Ինձ ընտրել է ժողովուրդը, հետևաբար՝ միայն ժողովուրդը կարող է ինձանից հարցերի պատասխաններ պահանջել», - հայտարարել է նա:
Հիշեցնենք, որ այսօր Դիարբեքիրում և Անկարայում ձերբակալվել է քրդամետ Ժողովրդադեմոկրատական կուսակցության 13 անդամ, այդ թվում` կուսակցության համանախագահներ Սելահաթթին Դեմիրթաշն ու Ֆիգեն Յուքսեքդաղը:
Այժմ մի շարք պատգամավորների անձեռնմխելիության մասին օրենքը, որն ամրագրված էր Սահմանադրության 83-րդ հոդվածով և արգելում էր պատգամավորներին «կալանավորել, հարցաքննել, դատապարտել առանց խորհրդարանի թույլտվության», համարվում է անվավեր:
2015 թվականի դեկտեմբերին այն ժամանակ Թուրքիայի վարչապետ Ահմեթ Դավութօղլուն քննադատել էր ԺԴԿ-ի քաղաքականությունը և նրա անդամներին մեղադրել ՔԱԿ-ի հետ կապերի համար։










