Մեկնարկել է Անոնիմուսների երթը (տեսանյութ)

18:11 • 05.11.16

18.21

Երևանում այսօր մեկնարկած Անոնիմուսների երթն այս պահին շարժվում է Կորյուն փողոցով, որտեղից ցուցարարներն իջնելու են Նալբանդյան փողոց: Երթը խաղաղ է ընթանում, մասնակիցները վանկարկում են «Ազատ, անկախ Հայաստան, «Ազատություն քաղբանտարկյալներին» և «Սասնա ծռեր»:

Երթի ընթացքում Շահեն Հարությունյանը դիմելով մասնակիցներին՝ հորդորեց ոստիկանության կողմից ներդրված սադրիչներին դուրս գալ երթից:

«Ոստիկանությունն ինձ ասաց, որ մասնակիցների մեջ էլեկրարաշոկ ունեցող մարդ կա, նորից զգուշացնում եմ բոլորին, որ երթն ունի խաղաղ նպատակ»,- ասաց Հարությունյանը՝ շարունակելով,– Ոստիկանությանն էլ հորդորում եմ, որ սադրիչներին դուրս բերի այս շարքերից: Ես այստեղ արդեն քաղաքացիական հագուստով ոստիկաններին տեսել ու բարևել եմ, իրենք մեր մեջ շատ են»:


––––––––

Ազատության հրապարակում քիչ առաջ մեկնարկեց «Ցեղակրոն» կուսակցության ղեկավար Շանթ Հարությունյանի որդու՝ Շահեն Հարությունյանի նախաձեռնած Անոնիմուսների հայտնի երթը:

Շահեն Հարությունյանը հրապարակում հայտարարեց, որ հորը՝ Շանթ Հարությունյանին կալանավորելուց հետո ամեն տարի անցկացրել ու պատրաստվում են անցկացնել նմանատիպ երթ:

Հիշեցնենք, որ 2013-ի նոյեմբերի 5-ին նույն Անոնիմուսների ակցիայի ժամանակ ձերբակալվեց, ապա կալանավորվեց նրա հայրը՝ Շանթ Հարությունյանը:

Շահեն Հարությունյանը նաև հայտարարեց, որ եթե հաջորդող հանրահավաքներում 10-15 հազար մարդ հավաքվի Ազատության հրապարակում, իրենք կշարժվեն դեպի Բաղրամյան 26:

Երթի մոտ 200 մասնակիցները անոնիմուսների դիմակներով ու ջահերով շարժվեցին դեպի Մաշտոցի պողոտա:

Այս պահին երթը շարժվում է Մաշտոցի պողոտայով, այնուհետև ակցիայի մասնակիցները կգնան Նալբանդյան փողոց ու վերադառնալու են Ազատության հրապարակ: 

Ի դեպ՝ Մաշտոցի պողոտայի երթևեկության մի կողմը փակ է:

Ոստիկաններն ուղեկցում են երթի մասնակիցներին: Այնտեղ է Երևանի փոխոստիկանապետ Վալերի Օսիպյանը:

Շահեն Հարությունյանը կոչ արեց քաղաքացիական հագուստով ոստիկաններին «իրենց տղամարդավարի պահել ու չսադրել»:

Մաշտոցի պողոտայում երթի մասնակիցների ջահերը հայտնվեցին գետնին, քանի որ նախատեսվածից շատ էին այրվել ու ոստիկանությունը կրակմարիչներով հանգցրեց  դրանք: