Ռուսաստանը ներգրավված չէ Չեռնոգորիայում հեղաշրջման փորձի մեջ. Պեսկով
Կրեմլը հայտարարել է, որ Ռուսաստանի իշխանությունները որևէ կապ չունեն Չեռնոգորիայում (Մոնտենեգրո) խորհրդարանական ընտրությունները տապալելու և երկրի վարչապետ Միլո Ջուկանովիչի նկատմամբ մահափորձ կատարելու փորձի հետ, հայտնում է BBC-ի ռուսական ծառայությունը:
«Անկասկած, մենք կտրականապես հերքում ենք որևէ հակաիրավական գործողության կազմակերպման փորձերին պաշտոնական ներգրավվածության հնարավորությունը»,- հայտարարել է Ռուսաստանի նախագահի մամուլի քարտուղար Դմիտրի Պեսկովը:
«Պաշտոնապես Չեռնոգորիայից ոչ մի դիմում չի ստացվել, ես չգիտեմ՝ եղել են արդյոք հարցումներ հատուկ ծառայությունների միջոցով, բայց այս դեպքում մենք որևէ տեղեկություն չունենք»,- հավելել է նա:
Ավելի վաղ Չեռնոգորիայի հատուկ դատախազ Միլիվոյե Կատնիչը հայտարարել է, որ «ռուս ազգայնականները» մահափորձ էին պատրաստում երկրի վարչապետ Միլո Ջուկանովիչի դեմ՝ ՆԱՏՕ-ին Չեռնոգորիայի անդամակցելը թույլ չտալու համար: Նա հայտնել է նաև, որ ապացույցներ չունի դրան ռուսական իշխանությունների ներգրավվածության վերաբերյալ:
Հոկտեմբերի 16-ին՝ խորհրդարանական ընտրությունների նախօրեին, Չեռնոգորիայի ոստիկանությունը ձերբակալել է 20 սերբ քաղաքացու, որոնք, իշխանությունների տվյալներով, զինված հարձակումներ էին նախապատրաստում ընտրատեղամասերի փակումից հետո պետական հաստատությունների վրա:










