Դպրոցի նախկին տնօրենին չվերադարձնելու դեպքում Աղձքի բնակիչները բողոքի ակցիան կտեղափոխեն կառավարության շենքի առջև

11:54 • 08.11.16

Աղձք գյուղում երեկվանից լարված իրավիճակ է. գյուղի միջնակարգի դպրոցի մոտ հավաքվել են դպրոցի աշակերտները, ծնողները (շուրջ 100 հոգի), և պահանջում են դպրոցի տնօրենի պաշտոնում վերականգնել օրերս աշխատանքից ազատված տնօրեն  Հարություն Սուքիասյանին:

Tert.am-ի հետ զրույցում ծնողներից մեկը՝ տիկին  Անահիտը, տեղեկացրեց, որ այսօր ևս վաղ առավոտից դպրոցի բակը մարդաշատ է:

«Այստեղ էր նաև  մարզպետ Գաբրիել Գյոզալյանն՝ իր խորհրդականների հետ, որը փորձում էր «ցրել» մեր հավաքը՝ նշելով, թե մենք հրահրում ենք երեխաներին՝ նրանց թույլ չտալով դպրոց գնալ: Մարզպետի՝ «ցրելու» փորձերն անհաջող էին, մենք շարունակում ենք մնալ այստեղ և պահանջել, որպեսզի անհիմն կերպով աշխատանքից ազատված մեր տնօրենին՝  Հարություն Սուքիասյանին, վերականգնեն իր պաշտոնում»,- պատմեց տիկին Անահիտը:

Վերջինս նաև մանրամասնեց, որ եթե Աղձքում իրենց հավաքները անարդյունք մնան, ապա առաջիկա օրերին մտադիր են բողոքի ակցիաներ անցկացնել Երևանում՝ նախագահական նստավայրի կամ կառավարության շենքի առջև: