Աֆրիկայում հին ինքնաթիռն անհետացել է` 72-ամյա օդաչուի հետ միասին
Աֆրիկայում անհետացել է 1943 թվականի արտադրության Piper Cub երկտեղանի օդանավը, որով ողջ մայրցամաքի տարածքում թռիչք էր իրականացնում 72-ամյա բրիտանացի օդաչուն:
Ինչպես հայտնում է BBC-ն, Մորիս Քիրքը մասնակցում էր հին ինքնաթիռների մրցարշավին` Կրետե կղզուց ուղևորվելով հարավաֆրիկյան Քեյփթաուն քաղաք:
Հաղորդվում է, որ ինքնաթիռն անհետացել է Սուդանի և Եթովպիայի միջև գտնվող տարածքում:
Ինչպես հաղորդում է BBC-ի թղթակիցը, կազմակերպիչները համոզում էին Քիրքին չմեկնել. օդանավի շարժիչը լավ վիճակում չի եղել, բացակայել է արբանյակային նավիգացիոն համակարգը և չի աշխատել անգամ կողմնացույցը: Սակայն օդաչուն չի հրաժարվել թռիչքից:
Կազմակերպիչների խոսքով` օդաչուն բավականին փորձառու էր արտակարգ վայրէջք կատարելու համար: Շուտով սկսվելու են որոնողական աշխատանքները:










